“Спортивные якутяне” спартакиада 76 тыһ. тахса үөрэнээччини хапта

Саха сирин 36 улууһун уонна куорат уокуруктарын 476 оскуолатыгар 76,8 тыһ. тахса кыттааччыны хабан, “Спортивные якутяне” үөрэнээччилэр өрөспүүбүлүкэтээҕи спартакиадаларын муниципальнай түһүмэҕэ ааста. Түмүктүүр түһүмэх бэс ыйын 4-8 күннэригэр Дьокуускайга буолуоҕа.

Тэрээһини ыытыыга бэлэмэнэнии хаамыытын Бырабыыталыстыба бэрэссэдээтэлин солбуйааччы Сергей Местников салайан ыыппыт тэрийэр кэмитиэт мунньаҕар көрдүлэр. Бэрэссэдээтэли солбуйааччы кыттааччыларга куттал суох буолуутун хааччыйыы уонна бэрээдэги көрүү, волонтердар үлэлэрин тэрийии, спартакиада үөрүүлээх аһыллыытыгар уонна сабыллыытыгар бэлэмнэнии боппуруостарынан үлэлэһэллэригэр эппиэтинэстээх биэдэмэстибэлэргэ сорудахтаата.

“Өрөспүүбүлүкэтээҕи тэрээһиннэр халандаарга киирбит былааннарыгар өссө биир суолталаах бэлиэ тэрээһин баар – быйыл үһүс төгүлүн ыытыллар үөрэнээччилэр спартакиадалара, бастакы, иккис түһүмэхтэринэн өрөспүүбүлүкэ бары оскуолаларын кэриэтэ хабар. Үһүс түһүмэххэ улуустартан 1,3 тыһ. тахса оҕо кэлэрэ күүтүллэр. Оҕолор успуорт биэс көрүҥэр күрэхтэһиэхтэрэ. Үгэс быһыытынан биһиги күүстээх хамаандалары, чөмпүйүөннэри бэлэмнээбит тириэньэрдэри булар инниттэн успуорт бу биэс көрүҥүн түмүктүүр түһүмэххэ хаалларабыт” – диэн Сергей Местников бэлиэтээтэ.

Былырыыҥҥыттан Ил Дархан Айсен Николаев спартакиадаҕа чөмпүйүөннэри бэлэмнээбит бастыҥ тириэньэрдэргэ анал төлөбүрү олохтообута. Быйылгы күрэхтэһии түмүгүнэн эмиэ 31 бастыҥ тириэньэргэ 100-түү тыһ. солк. туттарыахтара.

Спартакиада бырагырааматыгар успуорт 29 көрүҥэ киирэр, итинтэн түмүктүүр түһүмэх биэс көрүҥҥэ ыытыллар: бокса, волейбол, көҥүл тустуу, чэпчэки атлетика, мас-тардыһыыта. 2 саҥа көрүҥ киирбит: дроннар күрэхтэһиилэрэ уонна фитнес – аэробика.

Түмүктүүр түһүмэххэ успуорт биэс көрүҥүнэн тус зачекка 90 мэтээл кэмпилиэгэ уонна хамаанданан зачекка 15 кубок оонньонуоҕа.

Бу туһунан Ил Дархан уонна Бырабыыталыстыба пресс-сулууспата суруйар. Сиһилии манна ааҕыҥ.