“Спортивные якутяне” спартакиада үөрүүлээх аһыллыыта буолла

“Спортивные якутяне” үөрэнээччилэр өрөспүүбүлүкэтээҕи спартакиадаларын түмүктүүр түһүмэҕэр кыттаары өрөспүүбүлүкэ араас муннугуттан 1209 оҕо кэллэ.

Бу күннэргэ Дьокуускай куорат спортсмен оҕолорунан толору — “Спортивные якутяне” үөрэнээччилэр өрөспүүбүлүкэтээҕи спартакиадаларын түмүктүүр түһүмэҕэ ыытыллар.

Тэрээһин аһыллыытыгар “Туймаада” стадион оргуйан олорор. Бу сылга биирдэ ыытыллар спартакиадаҕа кыттаары 32 улуустан уонна куорат уокуругуттан 1209 үөрэнээччи саастыылаахтырын кытта эгил-тэгил киирсээри, эрбии биитинии эриһээри уонна ким күүстээҕин быһаарсаары муһунна.

Ил Дархан Айсен Николаев тэрээһин үөрүүлээх аһыллыытыгар: “Спартакиада чэрчитинэн хас биирдии иккис үөрэнээччи успуорт араас көрүҥэр  кытынна. Оскуола, улуус түһүмэхтэрин ааһан бүгүн манна бастыҥтан бастыҥнар муһуннугут. Бу күннэргэ биэс саамай сөбүлүүр, тарҕаммыт көрүҥнэргэ – чэпчэки атлетикаҕа, мас тардыһыытыгар, волейболга, көҥүл тустууга, бокса күрэхтэһиэххит.

Өрөспүүбүлүкэбитигэр сылтан сыл успуордунан дьарыктанар оҕо, улахан дьон элбээн иһэрин көрөбүт. Биһиги успуорт саалаларын, бассейннары, катоктары, аныгы, кыраһыабай Успуорт дыбарыастарын салгыы да тутуохпут. Бу барыта дьон чөл олоҕу тутуһарын, онтон оҕолорбут чэгиэн буола улааталларын туһугар оҥоһуллар.

Оҕолорго чиэһинэй, күүстээх оонньууну баҕарабын. Саамай бастыҥ, саамай күүстээх кыайдын! Түмүктүүр түһүмэххэ кыттааччылар бары чөмпүйүөннэргит” – диэн эттэ.

Кыттааччылар ааттарыттан андаҕар тылы Мииринэй куорат 26-с нүөмэрдээх оскуолатын 7-с кылааһын үөрэнээччитэ, хайыһарга өрөспүүбүлүкэҕэ биирдиилээн бастыыр иһин күрэхтэһиитин боруонса призера Анастасия Николаева эттэ.

Санатан аастахха, “Спортивные якутяне” үөрэнээччилэр спартакиадаларын түмүктүүр түһүмэҕэ бэс ыйын 4-6 күннэригэр Дьокуускайга ыытыллар. Успуорт биэс көрүҥүнэн биирдиилээн зачекка барыта 90 кэмпилиэк мэтээл, хамаанданан зачекка 15 кубок оонньонуоҕа.