“Спортивные якутяне” үөрэнээччилэр спартакиадаларыгар бэлэмнэнэллэр
![](https://sakha-sire.ru/wp-content/uploads/2024/06/sportivnye-yakutyane-900x596.jpg)
“Спортивные якутяне” спартакиада балаһыанньатыгар олоҕуран, 36 улуус уонна куорат уокуруктарын 434 оскуолатыгар 69 142 үөрэнээччини хабан, оскуола уонна улуус таһымнаах түһүмэхтэр аастылар.
Эрэгийиннээҕи түһүмэх СӨ биирдиилээн бастыыр иһин уонна өрөспүүбүлүкэ күрэхтэһиилэрин иитинэн ыытыллар.
Финалга успуорт 9 көрүҥэр күрэхтэһиэхтэрэ: бокс, волейбол, көҥүл тустуу, гиирэ успуорда, чэпчэки атлетика, мас тардыһыыта, оҕунан ытыы, саахымат, дуобат.
Спортивнай судьуйалар өрөспүүбүлүкэтээҕи кэллиэгийэлэрэ, Физическэй култуура уонна успуорт министиэристибэтэ сүрүн судьуйалар кэллиэгийэлэрин уонна көрүҥнэринэн судьуйалар састааптарын испииһэгин бигэргэппит. Спартакиада финалыгар барыта 150 судьуйа үлэлиэҕэ. Итини таһынан, Дьокуускай куорат оскуолаларын үөрэнээччилэриттэн 50 волонтер сыһыарыллыаҕа.
Нам улууһугар уунан сибээстээн ыксаллаах быһыы тахсан, спартакиада түмүктүүр түһүмэҕин Дьокуускай куоракка ыытар туһунан быһаарыы ылыныллыбыта:
— бокс – «Триумф» спортсменнары бэлэмниир кииҥҥэ
— волейбол – Хатас спорткомплексыгар
— көҥүл тустуу – Физическэй култуура уонна успуорт институтун тустар саалатыгар
— гиирэ успуорда – Физическэй култуура уонна успуорт институтун УЛК спортивнай саалатыгар
— мас тардыһыыта – “Манчаары Баһылай” аатынан спортсменнары бэлэмниир кииҥҥэ
— оҕунан ытыы – В.А.Босиков аатынан муусука үрдүк оскуолатыгар (институкка)
— дуобат, саахымат – Өрөспүүбүлүкэтээҕи саахымат-дуобат киинигэр.
Чэпчэки атлетика күрэхтэһиилэрин Горнай улууһун Бэрдьигэстээх сиэлиэнньэтин “Чыпчаал” стадионугар ыытар туһунан кэпсэппиттэрэ.
Тэрээһин үөрүүлээх аһыллыытын уонна сабыллыытын сиэрэ-туома, ону тэҥэ, көрүҥнэринэн кыайыылаахтары наҕараадалааһын Доҕордоһуу болуоссатыгар былааннанар.
Спартакиада кыттыылаахтарын сомоҕолуур бэлиэтинэн буолар Өрөгөй ырыатын толкуйдуур инниттэн, Өрөгөй ырыатын айарга куонкурус балаһыанньата бигэргэммитэ уонна ыам ыйын 14 күнүгэр кыайыылаах быһаарыллыбыта. Өрөгөй ырыата спартакиада үөрүүлээх аһыллыытыгар тыаһыаҕа. Бу туһунан тэрийээччилэр иһитиннэрэллэр.
Сообщить об опечатке
Текст, который будет отправлен нашим редакторам: