«Спортивные якутяне» үөрэнээччилэр спартакиадаларын иккис күнүн наҕараадалааһына буолла

Бу күннэргэ «Спортивные якутяне» үөрэнээччилэр спартакиадаларын түмүктүүр түһүмэҕэ ыытылла турар. Өрөспүүбүлүкэ 35 улууһуттан уонна куораттааҕы уокуругуттан 1600 оҕо кэлэн успуорт 9 көрүҥэр күрэхтэһэ сылдьар. Бэҕэһээ наҕараадалааһын иккис күнэ буолла.  

Традиционнай оҕунан ытыыга бастакы миэстэни ылбыт Орто Халыма оскуолатын 10-с кылааһын үөрэнээччитэ Иван Тарасов:

— Оҕунан ытыынан дьарыктаммытым үс сыл буолла. Орто Халыма “Боотур” саалаҕа эрчиллэбин. Улууспутуттан оҕунан ытыыга иккиэ буолан кытта кэллибит. Улууска ох көрүҥүн сэҥээрэр оҕо аҕыйах. Маҥнай бу көрүҥү бэйэм сөбүлээн дьарыктаммытым. Тириэньэрим Надежда Ивановна Бережнова икки сыллааҕыта кэлэн, күүскэ эрчийэн барбыта, — диэн кэпсиир.

Ох саанан ытыы көрүҥэр уопсай түмүккэ Мэҥэ Хаҥалас кыайыылааҕынан тахсан, үөрүү өрөгөйүн биллилэр, тэҥнээхтэрин булбатылар. Оҕунан ытыыга улуус хамаандатын старшай тириэньэрэ Прокопий Васильев:

— Уопсай түмүккэ бастаатыбыт, алта оҕо кытынна, оҕолорбут бары мэтээл ыллылар. Туох да улахан кистэлэҥмит суох. Оҕолорбут сыл устата көтүппэккэ дьарыктаммыттара. Ыам ыйын 22 күнүттэн сүүмэрдиир тэрээһини ыыппыппыт. Ол кэнниттэн Горнай улууһугар өрөспүүбүлүкэ чөмпүйэнээтигэр уонна биирдиилээн бастыыр иһин күрэхтэһиигэ кыттыбыппыт. Сылы быһа күүскэ эрчиллибит оҕолор ситиһиилээхтик кыттан, хамаанданан бастаатыбыт.

Былырыыҥҥы спартакиадаҕа биһиги төрдүс буолбуппут, быйыл ырааҕынан кыайдыбыт, оҕолорбор махтанабын, — диэн үөрүүтүн үллэстэр.

Мас тардыһыытыгар 50 киилэҕэ чөмпүйүөн үрдүк аатын ылбыт Чурапчы улууһун Сылаҥ орто оскуолатын 10-с кылааһын үөрэнээччитэ Эрхан Семенов:

— Мас тардыһыытынан дьарыктаммытым икки сыл буолла. Тириэньэрим Юрий Николаевич Семенов салайыытынан дойдубар Сылаҥҥа дьарыктанабын. Дириҥҥэ тиийэн сүүмэрдиир күрэхтэһиини ааһан кэлбиппит. Ыам ыйын бүтүүтэ Уфаҕа Евразия күрэхтэһиитигэр баран бастаабытым, өрөспүүбүлүкэҕэ биирдиилээн бастыыр иһин күрэхтэһиигэ үһүс, улууспар бастакы миэстэлэрдээхпин.

Успуордунан салгыы дьарыктанар былааннаахпын. Эһиил ыччаттарга киирсэбин, — диэн кэпсиир.

Бу күннэргэ Дьокуускай куоракка уонна Горнай, Хатас стадионугар, успуорка комплексыгар ыытылла турар “Спортивные якутяне” үөрэнээччилэр спартакиадаларын хамаанданан уопсай түмүгүн бүгүн киэһэ билиэхпит.