ВИДЕО. «Спортмастертан» табаар уорбут дьахтар сууттаныа

ИДьМ 4 №-дээх полициятын дьуһуурунай чааһыгар  «Спортмастер» успуорт маҕаһыынын  бэрэстэбиитэлэ 18 000 солк. кэриҥэ суумалаах табаары уорбуттарын туһунан иһитиннэрбит.

Полиция үлэһиттэрэ суһал-ирдиир тэрээһиннэринэн Ингушетия Өрөспүүбүлүкэтин 52 саастаах олохтоох дьахтара тутуллубут. Кини бу иннинэ  маннык буруйу оҥоруу иһин холуобунай эппиэккэ тардыллыбыта биллибит.

Полициялар силиэстийэ кэмигэр дьахтар атыы-эргиэн дьиэтигэр хас да төгүл сылдьыбытын, ол тухары табаар уорбутун быһаардылар. Биир  түгэҥҥэ, холобур, таҥас уларыттар сиргэ эр киһи таҥаһыттан уорууттан харыстыыр магнитын көтүрэн ылбыт. Сарсыныгар дьахтар сэлиэччигин, онтон эр киһи кууркатын уоран тахсыбыт.

Полициялар көрдүүллэрин билэн, дьахтар табаары бырахпыт уонна өрөспүүбүлүкэ таһыгар тахсан барбыт. Ол гынан баран кини холуобунай эппиэтинэстэн куотумматах, полициялар федеральнай көрдөөһүнү биллэрбиттэр уонна сотору кэминэн төрөөбүт дойдутугар туппуттар.

Билигин холуобунай дьыала  суут көрүүтүгэр ыытылынна. Силиэстийэ кэмигэр буруйданааччы хорумньуну толору төлөөтө. Бу туһунан ИДьМ пресс-сулууспата суруйар.