“Спутник” лааҕырга федеральнай бырагырааманан саҥа куорпустар тутулуннулар

Дьокуускайга “Спутник” оҕо лааҕырыгар саҥа куорпустар аһылыннылар. Түөрт түргэнник таҥыллар эбийиэги Арассыыйа Үөрэҕириитин министиэристибэтин федеральнай бырагырааматынан туттулар.

Тэрээһиҥҥэ Федерация Сэбиэтин бэрэссэдээтэлэ Валентина Матвиенко, РФ Үөрэҕириитин миниистирэ Сергей Кравцов, Ил Дархан Айсен Николаев кытыннылар.

Бырайыак оҕо сынньалаҥын инфраструктуратын саҥардар киэҥ далааһыннаах үлэ сорҕотунан буолла. Куорпустар федеральнай министиэристибэ сүүмэрдиир куонкуруһугар кыттыы түмүгэр тутулуннулар. Онон “Спутник” лааҕыр 200 миэстэнэн эбилиннэ. Үбүлээһин уопсай кээмэйэ 197 мөл. солк. тэҥнэһэр, итинтэн 144,5 мөл. солк. федеральнай хааһынаттан көрүлүннэ, уонна эрэгийиэнтэн, муниципальнайтан.

Федерация Сэбиэтин бэрэссэдээтэлэ Валентина Матвиенко оҕо сынньалаҥын сайыннарыы судаарыстыба ыытар бэлиитикэтин инники турар соруктарыттан биирдэстэрэ буоларын  бэлиэтээтэ. Кини этэринэн, ураты килиимэттээх Саха сиригэр оҕо лааҕырдарын аныгы инфраструктуратын тэрийии ордук суолталаах.

“Икки сыл устата улахан үлэ барда, онон эрэгийиэннэр икки ардыларыгар туруоруллубут соруктар туоллулар диэн этиэхпитин сөп. Оҕо сынньалаҥын инфраструктуратын саҥардыы бырагыраамата чахчы үлэлиир, эбии кыаҕы туһанарга көмөлөһөр. Чугастааҕы үс сылга бу сыалга анаан 9 млрд. солк. көрүллүөҕэ. Хабар иэммитин кэҥэтэбит, ол иһигэр саҥа эрэгийиэннэр эмиэ киирэллэр итиэннэ кыттааччы ахсаанын элбэтэр уонна байыаннай-патриотическай хайысханы сайыннарар соруктаахпыт. Бу барыта – оҕолорбут туһугар, биһиги кинилэргэ анаан үлэлиибит”, — диэн эттэ.

Ил Дархан Айсен Николаев федеральнай өйөбүл суолтатын бэлиэтээтэ уонна баар лааҕырдарга хапытаалынай өрөмүөнү тэрээһиннэрин хабар туһунан этии киллэрэн бырагыраама салгыы сайдыытын ыйда.

“Федеральнай бырагыраамаҕа кыттан, 2027 сылга диэри өрөспүүбүлүкэҕэ 700 миэстэлээх 14 муодульнай куорпус тутуллуоҕа. Бу – оҕо сынньалаҥын тэрийэргэ дьоһун кылаат. Ону таһынан, баар лааҕырдары олоччу хааччыйан туран хапытаалынай өрөмүөн бырагырааматын кэҥэтэргэ этии киллэрэбит”, – диэн Ил Дархан Айсен Николаев бэлиэтээтэ.

Ил Дархан иһитиннэрбитинэн, өрөпсүүбүлүкэҕэ 2030 сылга диэри оҕо сынньалаҥын, доруобуйатын бөҕөргөтүүнү тэрийии кэнсиэпсийэтэ ылыллыбыт. Ол чэрчитинэн оҕолорго табыгастаах усулуобуйаны олохтуурга саҥа бырайыактары былааннаабыттар.

Ил Дархан уонна Бырабыыталыстыба пресс-слууспата.