Хорсун буойуттар ааттара «Бастионы памяти» үйэтитилиннэ

Олунньу 2 күнэ — Сталинграды босхолооһун күнэ. Бу Сэбиэскэй Аармыйа ситиспит Улуу Кыайыыта бүтүн аан дойду үрдүнэн байыаннай-историческай суолталаах.

Волгоградка историяны харыстааһыҥҥа ыытыллар далааһыннаах үлэ иитинэн, Сталинграды көмүскээһиҥҥэ кыттыыны ылбыт саха сэмэй уонна хорсун-хоодуот дьонун ааттара үйэтитилиннэ.

«Якутянам — защитникам Сталинграда 1942-1943 гг.» өйдөбүнньүк обелиск аһыллыыта 2025 сыл бэс ыйын 21 күнүгэр Мамаев кургаҥҥа буолбута. Монумент Сталинград кыргыһыытыгар дьоруойдуу кыргыспыт саха буойуттарын чиэһигэр туруоруллубута уонна Улуу Кыайыы 80 сылыгар саҕаламмыт «Бастионы Победы» историяны кэрэһилиир патриотическай бырайыак бастакы өйдөбүнньүк бэлиэтинэн  буолбута.

Аҕа дойду уоттаах сэриитигэр Саха сириттэн 62 тыһ. тахса киһи барбыта, итинтэн 38 тыһ. тахсата дьиэлэригэр эргиллибэтэхтэрэ. Аҥаардас Сталинград кыргыһыытыгар Саха сириттэн 10 тыһ. тахса саллаат уонна офицер кыттыыны ылбыт.

—Бу миэхэ ураты суолталаах күн. Эһэм 292-с стрелковай дивизия пулеметчига Андрей Титович Титаров Сталинград кыргыһыытыгар сэриилэспитэ. Саха сирин тыһыынчанан уолаттара Ийэ дойдуларын көмүскээбиттэрэ, Сталинграды босхолуур иһин хорсуннук сэриилэспиттэрэ. Сэбиэскэй саллааттар манна туохха да тэҥнэммэт хорсун быһыылары көрдөрбүттэрэ, — диэн Ил Дархан Айсен Николаев бэлиэтиир.

Мемориал сахалыы оһуордаах гранит билиитэ. Онно нууччалыы уонна сахалыы: «Защитникам Сталинграда от благодарной Якутии» диэн суруктаах. Бырайыак ааптара — архитектор Андрей Ядрихинскай, «Сохраним памятники»  өрөспүүбүлүкэтээҕи көҕүлээһин кыттыылааҕа.

«Бастионы памяти» бырайыак иккис мемориала 2025 сыл атырдьах ыйын 24 күнүгэр Новгород уобалаһыгар аһыллыбыта. Онно 1589 биир дойдулаахтарбыт ааттара үйэтитиллибитэ. Ахсынньы 17 күнүгэр саха хорсун буойуннарыгар пааматынньык Смоленскай уобаласка Гагарин куоракка аһыллыбыта. Быйыл мемориаллары арыйыы Калуга уобалаһыгар, салгыы Ростовка, ДНӨ уонна Беларусь Өрөспүүбүлүкэтигэр былааннаналлар.

Сиһилии: https://www.sakha.gov.ru/news/19648

СӨ Ил Дарханын уонна Бырабыыталыстыбатын пресс-сулууспата