Стамбул прокуратурата Иран былааһын уорганнарыгар Армин Асгарины туталларыгар көрдөһөн ирдэбил ыытта. Бу киһи биир дойдулаахпыт Галина Трофимованы-Уу Далайаны өлөрүүгэ уорбаланар.
Бу быһылаан туһунан федеральнай көрдөрөр-иһитиннэрэр сириэстибэлэр эмиэ суруйдулар. ТРТ телеханаалга сигэнэн, ТАСС Стамбул прокуратуратын ирдэбилин туһунан иһитиннэрдэ.
“Бу быһылаан буолбутунан, холуобунай дьыала тэрилиннэ. Чинчийии түмүгүнэн, Иран гражданина Армин Асгари Стамбултан Тегераҥҥа көппүтэ билиннэ. Онон прокуратура Ираннааҕы кэлиэгэлэригэр уорбаланааччыны туталларыгар көрдөстө. Турция бэрэстэбиитэллэрэ кинини Стамбулга төттөрү аҕалар туһуттан, Тегераҥҥа көтөргө бэлэмнэр” диэн Стамбул прокуратуратын релиз суругар этиллэр.
Саха сириттэн төрүттээх Галина Трофимова Стамбулга аҕыс ый олорбута. Полиция чахчытынан, ахсынньы 24 күнүгэр Стамбул Кагытхан оройуонугар куортамнаспыт кыбартыыратыгар өлүгүн булбуттара. Кини сүппүтүн туһунан эмиэ Стамбулга олорор балта полицияҕа тыллаабыт.
Полиция биллэрбитинэн, бииргэ олорбут киһитэ Армин Асгари буруйу оҥорон баран, харчытын, сыаналаах малын халаабыт, оҕолору отельга хаалларбыт уонна дойдутугар Ираҥҥа куоппут.
Стамбулга баар РФ генконсульствота Арассыыйа гражданката өлбүтүн туһунан билэр уонна олохтоох былаастары кытары сибээстэһэ олорор диэн ТАСС иһитиннэрэр. Судмедэкспертиза ыытыллыбытын кэнниттэн, хайдах, туохтан өлбүтүн төрүөттэрин туһунан быһаарыы суруллуохтаах. Ол кэнниттэн дойдутугар илдьиэхтэрин сөп диэн бэрэстэбиитэлистибэҕэ иһитиннэрбиттэр.
Уу Далайа Үөһээ Бүлүүттэн төрүттээх, английскай тыл учууталынан үлэлээбитэ. Аҕыйах сыллааҕыта Москваҕа, онтон Стамбулга көһөн олорбута. Аар Саарын ойууҥҥа уһуйуллан, айылҕаттан айдарыыта арыллан, удаҕан буолбута, дүҥүрдэммитэ. “БацЗы” үөрэҕин, онтон дьоҥҥо көмөлөһөр алгыстары, медитациялары, куурустары ыытара, харысхаллары атыылыыра. Элбэх дьоҥҥо көмөлөспүтэ.
“Хабибушка” диэн ааттыыр киһитин “кэргэним” диэн суруйара. Хабиб диэн “тапталлааҕым” диэн тылбаастанар эбит. Кинилэр турецкай тылы үөрэтэр кууруска билсибиттэр. Галина урут кэргэн тахсан баран, ыараханнык олорбутун, арахсыбытын туһунан социальнай ситимигэр кэпсиир этэ. Онон өр кэмҥэ соҕотох сылдьан баран, эр киһини таптыыра уустугун билинэрэ. Ол эрээри, “Хабибушка” хайдах эрэ гынан кини сүрэҕин уулларбыт. Өр сылларга бииргэ дьоллоохтук олоруохпут диэн ыраланара. Бу ахсынньы 24 күнүгэр Ороһуоспа бырааһынньыгын дьиэ кэргэнинэн бэлиэтээри үөрэ-көтө сылдьыбыта. Сырдык тыына быстар күнүгэр «ийэбиттэн кэһии туттум, Саха сирин уомул балыгын» диэн үөрэн суруйбута. Кини куруук күлэ-үөрэ сылдьар, сырдык сыдьаайдаах, олоххо тардыһыылаах, күүстээх санаалаах киһи этэ…
“Кытаанах ирдэбиллэрдээх ислам дойдутугар төрөөбүт, улааппыт буолан, миигин өйдүүр, уустук үлэбэр өйүүр”, “Кини эмиэ астрологияны интэриэһиргиир буолан, мин киниэхэ сөп түбэһэрбин эрдэттэн билэр этэ”, “Арассыыйаттан сылдьар, оҕолоох дьахтары кэргэн ылыам диэн доҕотторугар эрдэттэн этэрэ үһү”, “Оҕолорбун тута ылыммыта, “кусняшкалар” кинини эмиэ сөбүлээбиттэрэ” диэн социальнай ситимин ханаалыгар суруйара, дьоллоохтук сылдьар хаартыскаларын таһаарара.
edersaas.ru саайт 2020 сыллаах архыыбыттан. Кыайыы 75 сылынан эһээм кэпсээниттэн тугу өйдөөн хаалбыппын суруйарга быһаарынным.…
Амма улууһугар Аҕа дойду Улуу сэриитин уотун ортотунан ааспыт көлүөнэ дьон Сулуһа суох Дьоруойунан билинэр,…
Бэҕэһээ, ыам ыйын 8 күнүгэр, Дьокуускай куоракка аан бастыкытын ыытыллыбыт "Кыайыы вальсыгар" үгүс киһи үөрэ-көтө…
Дьокуускайга "Өлбөт үйэлээх полк" Бүтүн Арассыыйатааҕы үгэскэ кубулуйбут аахсыйа буолан ааста. Быйыл манна 50 тыһыынчаттан…
Ленскэй оройуонугар муус көхтөөхтүк устарын бэлиэтииллэр. Муус хамсааһынын орто диэн сыаналаатылар, уу таһыма рейкэ кээмэйигэр…
80 сыл анараа өттүгэр, ыам ыйын 9, 10 күннэригэр, “Кыым” хаһыакка тугу суруйбуттарай? Бу суруйуулары…