Стефан Георгиев: «Биир күн сынньаммакка, 14-түү чаас үлэлиирбит»

Донбасска быраастар маҥнайгы сырыыларыгар 1,5 тыһыынча олох­тоох уонна байыаннай сулууспалаах до­­руобуйатын көрбүттэрэ-истибиттэрэ, ону таһынан, ыарахан ыарыылаах оҕолорго сүбэ-ама биэрбиттэрэ.

Офтальмология өрөспүүбүлүкэтээҕи килиниичэскэй балыыһатын офтальмолог-бырааһа Стефан Георгиев сырыы туһунан, 2022 сыл хайдах түмүктэммитин туһунан санаатын үллэстэр:

– Донбасска тиийэн нэһилиэнньэни кытары көрсүһүүлэргэ кинилэр урусхалламмыт дьиэлэрин-уоттарын, ытыалааһын туһунан кэпсээннэрин эт кулгаахпытынан истибиппит, илэ харахпытынан көрбүппүт. Биһиги көрсүбүт дьоммут уйадыйбыт харахтарын көрүө этигит. Кинилэр биһиэхэ ис сүрэхтэн тахсар махталларын истэр, үөрбүт харахтарын көрөр – эмиэ ураты иэйии. Туох барыта тэҥнэбилгэ биллэр диэччилэр. Ол курдук, биһиги эмиэ дойдубутугар баары улаханнык сыаналаабат, буолуохтаах буолуохтааҕын курдук ылынар эбиппит. Онтон нус-хас олоҕу билбэтэхтэрэ ырааппыт дьону көрдөххүнэ, күннээҕи олоххо болҕомтолоохтук сыһыаннаһыахтааххын уонна харыстыахтааххын дьэҥкэтик өйдүүр эбиккин. Биһиги үлэлээбит балыыһабыт дьоно уонна олохтоохтор Саха сирин көмөтүн олус улаханнык сыаналыыллара. Хас биирдии көрсүбүт иккис киһибит Саха сиригэр махтанар этэ.