Степан Саргыдаев: «Чурапчыга Куохара үрэх кытылын тупсарыы үлэтэ 2026–2027 сылларга саҕаланыахтаах»

Саха Өрөспүүбүлүкэтин Судаарыстыбаннаhын күнүгэр Ил Дархан Айсен Сергеевич Николаев эрдэттэн болдьоммут быhа эпиирин кэмигэр  балтараа тыһыынча кэриҥэ боппуруос киирдэ.

Олорго хоруйдууругар Ил Дархан Чурапчы улууһун аҕынна.

— «Олох-дьаһах инфраструктурата» национальнай бырайыак чэрчитинэн «Куорат табыгастаах эйгэтин оҥоруу» федеральнай бырагыраама чэрчитинэн дьон сынньанарыгар табыгастаах эйгэни тэрийии, тупсарыы хайысхатыгар олохтоох көҕүлээһин быһыытынан өрөспүүбүлүкэ улуустарыттан кыттыбыт бырайыактартан барыта 7 бырайыак кыайыыны ситиспитин, грант үбүн ылар кыахтаммыттарын туһунан кэпсээтэ. Олор ортолоругар Айсен Николаев Чурапчы уонна Бороҕон улуустарын бырайыактара баалларын бэлиэтээн туран, бу бырайыактар олоххо киириэхтэригэр эрэнэрин биллэрдэ.

Ити этиллибит грант үбүгэр Чурапчы сэлиэнньэтигэр Куохара үрэх кытылын тупсарыы үлэтэ 2026–2027 сылларга саҕаланыахтаах. Бырайыак Арассыыйа бэрэсидьиэнэ Владимир Путин көҕүлээһининэн ыытыллыбыт «Олох-дьаһах инфраструктурата» национальнай бырайыагын чэрчитинэн, «Куорат табыгастаах эйгэтин оҥоруу» федеральнай бырагырааманан олоххо киириэ. Ону олоххо киллэрэргэ 50 мөлүйүөн солкуобай федеральнай үптэн көрүллүөҕэ.

Куохара үрэх кытыла сэлиэнньэ киининэн, саҥа тутуллубут түөлбэттэн уонна араас тэрилтэлэртэн чугас сытар. «Халыма» федеральнай трассаттан чугас буолан, бу сир олохтоохтору эрэ буолбакка, туристар сылдьалларыгар эмиэ табыгастаах. Бырайыак быһыытынан сэргэҕэ майгынныыр стелалаах киирэр аан, худуоһунньук Афанасий Мунхалов кэриэһигэр «Графика» пирс, массыына туруорар сир, сылаас павильоннаах уонна аһаҕас террасалаах кафе, кэрэ көстүүлээх былаһаакка уонна фонтан, тэрээһиннэр ыытыллар сирдэрэ, оонньуур сир, уонна спортивнай былаһаакка тутуллуохтара. «Алаас» тутар хампаанньа үлэтин Ил Дархан иһинэн архитектура, тутуу киинэ уонна Территория сайдыытын компетенциятын киинэ хонтуруоллаан оҥорторуохтара.

Бырайыак 10-с Бүтүн Арассыыйатааҕы табыгастаах куорат эйгэтин оҥорууга бастыҥ бырайыактар ​​куонкурустарын чэрчитинэн, Уһук Илиҥҥи федеральнай уокурук субъектарыгар ыытыллыбыт 4-с куонкуруска кыайыылаахтартан биирдэстэринэн буолбута. Куонкурус түмүгэ атырдьах ыйыгар Казань куоракка биллибитэ. Саха сирэ 420 мөл.солк. суумалаах 7 бырайыагы үбүлээһиҥҥэ кыайбыта. Онон Тиксии, Эдьигээн, Ленскэй, Бороҕон, Уус Маайа, Ытык Күөл, Чурапчы болуоссаттарын уонна кытыл уулуссаларын тупсарыы ыытыллыаҕа, — диэн Чурапчы улууһун баһылыга Степан Саргыдаев санаатын үллэһиннэ.