Степан Саргыдаев: «Дьон-сэргэ бырааба күөмчүлэммэтэ ырылыччы көһүннэ»

Степан Саргыдаев, Чурапчы улууһун баһылыга:

—Чурапчы нэһилиэгин баһылыгыттан саҕалаан улуус баһылыгынан талыллан баһылыктыы уонна өрөспүүбүлүкэ муниципальнай тэриллиилэрин Сэбиэтин салайа сылдьар киһи быһыытынан көрүүбэр, норуокка саамай чугас уонна саамай көдьүүстээх былааһы, олохтоох салайыныыны, оннунан хаалларыыга итиэннэ быыбары ыытыыга эбии көрүҥнэри киллэрэн биэрэр этиилэри сөптөөҕүнэн ааҕабын.

Ил Түмэн уочараттаах мунньаҕын сиһилии көрдүм-иһиттим. Манна өрөспүүбүлүкэ Төрүт Сокуонугар олохтоох бэйэни салайыныы эйгэтигэр уларытыылары киллэрэр этиилэртэн биирэ да дьон-сэргэ быраабын күөмчүлээбэтэ ырылыччы көһүннэ. Ол курдук, Төрүт Сокуоммут 97 ыстатыйатын 33 №-дээх Федеральнай сокуоҥҥа толору сөп түбэһиннэрии бэрээдэгинэн киллэриллэр.

Биһиги өрөспүүбүлүкэбитигэр олохтоох салайыныы икки таһыма оннунан хаалар. Онон Ил Дархан Айсен Николаев Төрүт Сокуон бар дьоҥҥо биэрэр бырааптарын мэктиэлээччи быһыытынан олохтоох бэйэни салайыныыга быыбары ыытыыга уруккуттан баар быраап нуорматын оннунан хаалларан туран, федеральнай сокуон биэрэр эбии бырааптарын киллэрэн күүһүрдэргэ этиитин оруннааҕынан ааҕабын уонна өйүүбүн. Ити көрүҥнэртэн хайатынан да талыллыбытын иһин быыбардааччы син биир баһылыгы чахчы бэриниилээхтик үлэлииринэн, олохтоохтор баҕаларын олоххо киллэриини төһө туруулаһарынан, кыһалҕалары хайдах быһаарарынан көрөн үлэлэтиэҕэ.