Хаартыска: Олоҥхо тыйаатырын сайтыттан
Арассыыйа норуодунай артыыһа, Былатыан Ойуунускай аатынан Судаарыстыбаннай бириэмийэ лауреата, Саха тыйаатырын артыыһа, Олоҥхо тыйаатырын төрүттээччи, тыйаатыр режиссера, норуот тапталлаах артыыһа Степанида Борисова 75 үбүлүөйдээх сааһынан көрөөччүлэрин ыҥырар.
Бастатан туран, Степанида Борисова Олоҥхо тыйаатырыгар режиссер быһыытынан туруорбут испэктээктэрэ буолуохтара. Ол курдук, муус устар 15 күнүгэр Н.П. Бурнашев-Боодьоҕос “Кыыс Дэбилийэ”, муус устар 16 күнүгэр Индия былыргы драматура, бэйиэтэ Калидаса поэматынан “САХААНТАЛА” (Наталья Михалева-Сайа тылбааһыгар) көстүөхтэрэ.
“Кыыс Дэбилийэ” испэктээги аан бастаан режиссер Андрей Борисов 2000 сыллаахха туруорбута. 2001 сыллаахха Арассыыйа “Кыһыл көмүс мааска” бириэмийэтин ылбыта. Сүрүн оруолу Степанида Борисова толорбута. 19 сылынан “Кыыс Дэбилийэҕэ” эдэр көлүөнэ артыыстар – Култуура уонна ускуустуба Арктикатааҕы судаарыстыбаннай институтун ыччаттара, сүрүн оруолга Ньургуйаана Маркова уонна Анастасия Алексеева оонньообуттара. Билигин кинилэр үгүстэрэ — Олоҥхо тыйаатырын артыыстара.
“САХААНТАЛА” — аан дойдуга аатырбыт Индия классическай айымньыта аан бастаан сахалыы саҥарбыта, дорҕоон тойугунан туругурбута.
Сахаанталаны Наталья Слепцова, Дуулаҕа Бэргэн Ыраахтааҕыны Владимир Михалев оонньууллар.
Онтон Степанида Ильиничнаны артыыс быһыытынан сүрүн оруолга муус устар 17 күнүгэр буолар В.Распутин “Матера, бырастыы” испэктээккэ билсиэххит.
«Матёра, бырастыы» испэктээк субу сибилигин ууга барыаххыт диэн куттаан, дьону-сэргэни өмүтүннэрэн, иннини-кэннини быһаарарга бириэмэ да бэриллибэт ыгым кэмнэри көрдөрүүттэн саҕаланар. Дэриэбинэ олохтоохторуттан кистии-саба киһи уҥуохтарын кириэстэрин алдьаталаан, ууга ыытары да кэрэйбэт санэпидстанция үлэһиттэрин сиэргэ баппат дьайыылара олохтоохтору уолутар. Хараҕын уутун туттунар да буоллар, дьонун-сэргэтин аймаабат туһугар тулуурун, мындыр өйүн көрдөрөр Даарыйа (Степанида Борисова) уобараһа олус күүстээх. Кини хас биирдии этиитэ орто дойду олоҕун, билигин баары сыаналыырга үөрэтэр суолталаах.
Испэктээги көрө олорон, “Матёра, бырастыы” сахалыы тылбаастанан (тылбаасчыт Мария Докторова) мээнэҕэ туруоруллубатаҕын өйдүүгүн. Бастатан туран, испэктээк М. Щепкин аатынан тыйаатыр үрдүкү училищетын 1974 сыллаахха бүтэрбит саха устуудьуйатын 50 сылыгар анаммыта. Ону сэргэ, оруолларга икки састаап оонньуур. Бу испэктээгинэн аҕа саастаах көлүөнэ, академическай тыйаатыр да буоларынан, эдэрдэргэ бэйэтин маастарыстыбатын өссө төгүл көрдөрдө.
Өрөспүүбүлүкэтээҕи харах килиниичэскэй балыыһатын кылаабынай бырааһа Иван Луцкан Арассыыйа Бэрэсидьиэнин Ыйааҕынан Пирогов уордьанын ылар чиэскэ…
Үөрэх уонна билим миниистирэ Нюргуна Соколова суруналыыстары кытта көрсөн ааһан эрэр сыл барыллаан түмүгүн кэпсээтэ,…
Дьокуускайга "Дохсун" успуорт комплексыгар СӨ физическэй култууратын уонна успуордун министиэристибэтин түмүктүүр тэрээһиннэрэ саҕаланнылар. Ону сэргэ,…
Сааһырбыт киһи доруобуйатын күннэтэ көрүнэр, чэбдигирдэр буоллаҕына, уһуннук доруобай, чөл туруктаах сылдьыан сөп. Сааһырбат дьоҥҥо…
Кини граҥҥа киирсиитэ бу бастакы сырыыта буолбатах. Ол курдук, СӨ Тыатын хаһаайыстыбатын уонна ас-үөл бэлиитикэтин…
“Уһук Илин сулуһа” (“Звезда Дальнего Востока”) сыллата ыытыллар уопсастыбаннай-дьыалабыай бириэмийэҕэ Уһук Илиҥҥэ уонна Арктикаҕа олоххо…