«Стерх» бэстибээл дойду бастыҥ тыйаатырдарын түмтэ

Дьокуускайга Судаарыстыбаннай опера, балет тыйаатырыгар ыам ыйын 31 күнүттэн бэс ыйын 7 күнүгэр диэри  XI «Стерх» Бүтүн Арассыыйатааҕы классическай балет бэстибээлэ буола турар. 

Бэстибээлгэ Улахан уонна Мариинскай тыйаатырдар, Н.Касаткина уонна В.Васильев ааттарынан Классическай балет тыйаатыра, Новосибирскайдааҕы уонна Башкирскай опера, балет тыйаатырдара, «Астана балет» тыйаатыр уонна Белоруссия Улахан тыйаатыра кытталлар.

— «Стерх» бэстибээл олус чаҕылхайдык ааһыа диэн эрэллээхпин. Биһиги хореографическай ускуустуба үрдүк таһымын дьиэбититтэн ырааппакка эрэ көрөр дьоллоохпут. Классическай балет бырааһынньыгынан артыыстары уонна көрөөччүлэри эҕэрдэлиибин! — диэн Айсен Николаев эттэ.

Бэстибээл бырагырааматыгар — «Лебединое озеро» (П.И.Чайковскай), «Баядерка» (Л.Минкус), Юрий Григорович туруорбут «Спартак»(А.И.Хачатурян) испэктээкиллэрэ уонна гала-кэнсиэр,   Кирилл Герасимов туруорбут «Сияющий камень» премьерата бааллар.

Үөрэтэр бырагырааматыгар бэрэпиэссэр, культурология дуоктара Ольга Сапанжа (Санкт-Петербург) балет туһунан лиэксийэлэрэ, бэрэпиэссэр, А.Я. Ваганова аатынан Нуучча балетын академиятын доцена Ольга Розанова (Санкт-Петербург) лиэксийэлэрэ буолуохтара.

Буоларын курдук, көрөөччүлэр артыыстары олус сылаастык, дохсун ытыс тыаһынан  көрүстүлэр.

Ил Дархан, бырабыыталыстыба пресс-сулууспата.