Хаартыска: Мария Васильева (СИА).
Стоматология уонна сыҥаах-сирэй хирургиятын киинин эспиэртэрэ Саха сиринээҕи биир идэлээхтэрин үлэлэрин үрдүктүк сыаналаатылар.
Саха сиригэр “сыҥаах-сирэй хирургията” хайысханан мэдиссиинэ көмөтүн оҥоруу туругун сыаналааһыҥҥа, Стоматология уонна сыҥаах-сирэй хирургиятын билим-чинчийэр киин институтун көһө сылдьар тэрээһиннэрин барыллаан түмүгүн, бүгүн бырабыыталыстыба бэрэссэдээтэлин солбуйааччы Ольга Балабкина ыыппыт мунньаҕар көрдүлэр.
“СӨ сыҥааҕы-сирэйи эмтиир, көннөрөр сулууспа үлэтин хаачыстыбата үчүгэй. Биһиги Мэдиссиинэ национальнай киинигэр уонна Мэдиссиинэ суһал көмөтүн киинигэр үлэлээтибит, сытар балыыһа ыарыһахтарыгар көрүллэр анал көмө оҥоһуллуутун, ол иһигэр үрдүк технологиялаах мэдиссиинэ көмөтүн бэрэбиэркэлээтибит. Тэрилинэн хааччыллыы бэртээхэй, исписэлиистэрэ туйгуннар”, — диэн бэрэбиэркэ түмүгүн Стоматология уонна сыҥаах-сирэй хирургиятын билим-чинчийэр киинин институтун салаатын сэбиэдиссэйэ Сергей Буцан билиһиннэрдэ.
Федеральнай эспиэртэр, Саха сиринээҕи хирурдар элбэх эпэрээссийэни – сылга ортотунан 1200-кэ тиийэ оҥороллорун, итинтэн 60-80 % суһал көрүҥнээҕин бэлиэтииллэр. Ону тэҥэ, үрдүк технологиялаах көмөнү көрүү былаана туолбутун, маннык 50 эпэрээссийэни оҥорбуттарын иһитиннэрдилэр.
Ольга Балабкина Саха сирин сыҥаах-сирэй сулууспатын исписэлиистэрэ бу салаа ыарыыларын туоратыыга 40 сыл устата үлэлээн кэлбиттэрин этэр. Сулууспа сүрүннээн сирэй эчэйиилэрин, сирэй уҥуоҕар уонна сирэйгэ тахсыбыт искэни, ириҥэлээх тымныйыы, о.д.а. ыарыыларынан дьарыктанар.
Мунньах кыттыылаахтара сулууспа сайдар кэскилин, телемэдиссиинэ сүбэлэрин кыаҕын, эмтээһин аныгы ньымаларын киллэриини, исписэлиистэри үөрэтии уонна стажировка туһунан ырыттылар. Быһаарыыны эрэйэр кыһалҕанан каадыры элбэтии боппуруоһун эттилэр. “Улахан дьон сулууспатыгар исписэлиистэри үөрэтэр ирдэнэр, ыстаатынан табыллар. Оҕолор сулууспаларыгар өссө биир ыстааты эбэр наада”, — диэн Сергей Буцан этии киллэрдэ.
“Ил Дархан Айсен Николаев мэдиссиинэ көмөтүн хаачыстыбатын үрдэтии, “Доруобуйа” национальнай бырайыагы олоххо киллэрии боппуруоһугар улахан болҕомтотун уурар. Өрөспүүбүлүкэҕэ «сыҥаах-сирэй хирургията» хайысхаҕа тэрээһин хаачыстыбатын үрдэтии уонна мэдиссиинэ көмөтүн оҥоруу үрдүк сыаналааҕа биһиэхэ улахан суолталаах”, — диэн Ольга Балабкина түмүктээн эттэ.
Ил Дархан уонна Бырабыыталыстыба пресс-сулууспата.
Ахсынньы 29 күнэ. Ил Дархан Мэҥэ Хаҥалас улууһугар үлэлээтэ. Аллараа Бэстээххэ учаастактааҕы балыыһа саҥа дьиэтэ…
Саха саныырынан, утуйар уу араастаах. Сылбай уу кэмэ -- киэһэ сыппыт кэннэ түүн үөһүгэр диэри.…
Хатас нэһилиэгэ сыллааҕы үлэни-хамнаһы түмүктүүр киэһэтэ буолан ааста Сылы түмүктүүр, ааспыты анаарар, буолбуту ырытар ахсынньы…
Өрөспүүбүлүкэҕэ биир саамай кэрэ кэргэннии паараларынан Айталина уонна Вячеслав Лаверновтар буолаллар. Томпо уонна Амма Кэрэ…
Өбүгэлэрбит хайдах күн-дьыл буолуон эндэппэккэ билэллэрэ. Айылҕа араас көстүүтүн, оту-маһы, кыылы-сүөлү кэтээн көрөллөрүн туһунан элбэхтэ…
Атамайга элбэх хайысхалаах кииҥҥэ сэргэх тэрээһин буолла. Тэрээһин бастакы чааһыгар Атамай нэһилиэгин түөлбэлэригэр бастыҥнары чиэстиир…