Стратегическай былаһаакка дойду 78 эрэгийиэниттэн 257 салайааччыны түмтэ

Ил Дархан Айсен Николаев ахсынньы 11 уонна 12 күннэригэр Дьокуускайга ыытыллар «Төрөөбүт дойду – Арассыыйа күүһэ» III Бүтүн Арассыыйатааҕы пуорум эрэгийиэннээҕи күнүгэр кыттынна.

Кини бэйэтин тг-ханаалыгар ол туһунан суруйда:»Бу стратегическай былаһаакка дойду 78 эрэгийиэниттэн 257 салайааччыны түмтэ.
Бу көрсүһүү Арассыыйа саамай улахан эрэгийиэнигэр уонна аан дойдуга саамай киэҥ-куоҥ сирдээх-уоттаах – Саха сиригэр – буолара улахан суолталаах. Бу тиэмэ уонна суолталааҕын көрдөрөр: улахан куораттартан саҕалаан кыра бөһүөлэктэргэ тиийэ, дьоҥҥо табыгастаах уонна инники кэскиллээх олоҕу сайыннарыыны хайдах салайары бэлиэтиир.
Биһиги биир кэмнээх быһаарыылар туһунан буолбакка, куораттарбыт олохторун 10–20 сылга инники быһаарар уһун болдьохтоох стратегиялар тустарынан кэпсэтэбит. Стратегическай сайдыы былаанын олоххо киллэрэр, концепциялары инфрастуруктура дьиҥнээх эбийиэктэригэр уонна табыгастаах эйгэҕэ кубулутар, куорат үрдүнэн экэнэмиичэскэй үүнүүнү оҥорон таһаарар чопчу механизмнары уонна инструменнары үөрэтэбит. Брянка курдук, саҥа сөргүтүллэр уонна сайдар сиргэ, бу уопут туохха да тэҥнэспэт. Биһиги инникини «ыраас лиистэн» буолбакка, Арассыыйа бастыҥ практикаларыгар олоҕуран олук уурарбыт наада», — диэтэ кини.

Маннык кэпсэтиигэ кыттыы кэллиэгэлэр ураты уопуттарын ылыыга эрэ буолбакка, федеральнай эспиэртэри кытта былааннаах инструменнары биһиги усулуобуйаларбытыгар хайдах сөп түбэһиннэрэри быһаччы ырытарга эмиэ көмөлөһөр диэн Ил Дархан этэр. Территориялары сайыннарыыга, чуолаан маннык комплекснай уонна стратегическай сыһыан – толкуйтан саҕалаан олоххо киллэриигэ диэри – биһиги төрөөбүт дойдубут уонна бүттүүн дойдубут күүһэ онно сытар диэн Ил Дархан санаатын этэр.