“Страж”: “Бу ордук байыаннай дьайыы бүттэҕинэ көстүөҕэ”.

Саха сирин военкордарын телеграм-ханаалларыгар үгүстүк байыаннай дьайыыга сылдьар уолаттар санааларын таһаараллар.

Биир оннук “Боотур БАРС-2” этэрээтигэр сулууспалыыр “Страж” диэн ыҥырыллар ааттаах байыастан, тоҕо кини саа-саадах тутан дойдутун көмүскэлигэр туруммутун, байыаннай дьайыы кыттыылаахтарын уонна былаас хардарыта сыһыаннара хайдаҕын ыйыппыттар.

“Страж” эппиэтэ:

Судаарыстыба бэрэстэбиитэллэрэ уопсастыбаны, ордук байыаннай дьайыы кыттыылаахтарын кытта көдьүүстээхтик хардарыта сыһыаннаһары сатыахтаахтар. Бу ордук байыаннай дьайыы бүттэҕинэ көстүөҕэ. Инники кирбиигэ буола турар быһыыны-майгыны, туруоруллар соругу өйдөөбөт буоллахха, эйэлээх олоххо байыаннай дьайыы кыттыылааҕын кытта кэпсэтиини олохтуур кыайтарыа суоҕа. Бу үлэҕэ сокуон хараҕынан эрэ буолбакка, моральнай-этическэй нуорманы учуоттаан туран, быһаарыныы ылынар уонна онон салайтарар наада.

Төлөбүр туһунан этэр буоллахха, биһигини ыҥырар кэмнэригэр төлөбүр диэн суох этэ. Ол гынан баран онтон улаханнык долгуйбатаҕым, мин Ийэ дойдубун көмүскүү баран истэҕим дии, харчы да, мэтээл да, статус да туһугар буолбакка.

Төннөн кэлбитим кэннэ бойобуой дьайыылар бэтэрээннэрэ буолбутум, дьиэ кэргэним судаарыстыбаттан социальнай өйөбүлү ылбыта. Кыра кыыһым уһуйааҥҥа босхо сылдьар, улахан кыыһым үөрэххэ киирэригэр чэпчэтиинэн туһаныа. Бу биһиги дьиэ кэргэммитигэр ботуччу көмө буолар.

“Страж” ыҥырыллар ааты мээнэҕэ талбатаҕым. Олоҕум 22 сылын мин уопсастыба олоҕор сулууспалааһыҥҥа анаатым. Өр кэмҥэ ИДьМ систиэмэтигэр үлэлээбитим, кэлиҥҥи үс сылга – Силиэстийэлиир кэмитиэккэ.

Мин патриот буоларым быһыытынан байыаннай дьайыы буола турар сиригэр барбатым хайдах да кыаллыбат этэ. «Барс-2 Боотур» добровольческай этэрээккэ сулууспабын олунньуга саҕалаабытым. Хантараагым болдьоҕо атырдьах ыйыгар бүтүөхтээх. Ол эрээри мин ону уһатар туһунан саныы сылдьабын.

Силиэстийэлиир кэмитиэккэ үлэлээһин син биир ИДьМ курдук – судаарыстыбаҕа сулууспалааһын буолар. Ол гынан баран манна, инники кирбиигэ, эн дьиҥнээхтик эйэ уонна куттала суох олоруу хайдах курдук үрдүк сыаналаахтарын өйдүүгүн.

Мин эрэнэбин, бэйэтин патриотынан уонна гражданинынан ааҕынар эр киһи Ийэ дойдутугар иэһин төлүөхтээх. Билигин онно туох барыта кыаллар буолан турар, Оборуона министиэристибэтин кытта хантараак уонна добровольческай холбоһуктар.

Мин аймахтарым, доҕотторум, билэр дьонум ортотугар бойобуой дьайыыны ааспыттар аҕыйаҕа суохтар. Хомойуох иһин, төннүбэтэхтэр да бааллар. Ол эрээри биһиги хас биирдиилэрин өйдүүбүт. Кыайыы биһиэнэ буолуоҕа! Өстөөҕү үлтүрүтүөхпүт!