Субсидиялаах куортамныыр дьиэ бырагыраамата саҕаланна

«Доступное арендное жильё в ДФО» бырагыраама ахсынньы 22 күнүттэн Уһук Илин икки эрэгийиэнигэр үлэлээн саҕалаата. Ол курдук, Чукоткаҕа уонна Приморскай кыраайга саҥа дьиэлэр тутуллан, сыл бүтүөр диэри 82 дьиэ кэргэн киириэҕэ.

Бырагыраамаҕа ДОМ.РФ, Арассыыйа тутууга министиэристибэтин уонна Уһук Илини, Арктиканы сайыннарыы министиэристибэтэ кытталлар. ДОМ.РФ Уһук Илин 9 эрэгийиэнигэр 4 тыһыынча кыбартыыра тутулларын үбүлээбитэ.

Ол курдук,Владивостокка «Айвазовскай» комплекска 42 кыбартыыраҕа, Анаадырга «Ягоднай» комплекска 40 кыбартыыраҕа киирэргэ дьон күлүүстэрин туттулар.

Саҥа кыбартыыралар өрөмүөннэнэн, миэбэлинэн, тиэхиникэнэн хааччыллыбыттар, аныгылыы тупсаҕай көрүҥнээхтэр.

Бу бырагыраама чэрчитинэн, устудьуоннар, эдэр исписэлиистэр, оробуочайдар куортамныыр кыбартыыраларыгар куортам сыанатын үс гыммыт биирин эрэ төлүөхтэрэ.  Бырагыраама кэҥээн, Уһук Илин бары эрэгийиэннэригэр, ол иһигэр Саха сиригэр, үлэлиэҕэ.

Бу туһунан Уһук Илиҥҥэ бэрэсидьиэн бастайааннай боломуочунайа Юрий Трутнев бу курдук эттэ:

— Биһиги Уһук Илиҥҥэ 140 тыһыынча кэриҥэ үлэ миэстэтин таһаардыбыт. Урут биһиэхэ үлэ миэстэтин таһаарыы боппуруоһа сытыытык турбут эбит буоллаҕына, билигин бу дьону ханна олордор кыһалҕата үөскээтэ. Үлэһит дьон үчүгэй усулуобуйаҕа олоруохтаах. Бэрэсидьиэн сорудаҕынан, куортамныыр дьиэ бырагыраамата үлэлээн эрэр. 10 тыһыынча кыбартыыра тутуллуохтаах, федеральнай уонна эрэгийиэннээҕи субсидиялар көмөлөрүнэн,  сыаната чэпчэки — ырыынак сыанатыттан үс гыммыт биирэ буолуоҕа. Онон бу ахсынньыга бастакы куортамнааччылар киирдилэр.

Куортам кыбартыыраларын күлүүстэрин бастакынан ылбыт дьону эҕэрдэлиибин! Бу маннык үчүгэй усулуобуйа эһиэхэ анаан бэрэсидьиэн Владимир Путин сорудаҕынан оҥоһулунна. Маныаха Национальнай баай-дуол пуондатыттан 87 миллиард солкуобай көрүллүбүтэ. Үлэ өссө да элбэх. Бу дьиэлэргэ олорон, дьоллоох буоларыгытыгар, Уһук Илини сайыннарарга стиһиилээхтик үлэлииргитигэр баҕарабын. Маннык улахан иэннээх сири бары бииргэ туруннахпытына, хас биирдиибит эппиэтинэһи ылыннахпытына эрэ, сайыннарар кыахтаахпыт. Үүнэн эрэр Саҥа дьылынан эҕэрдэлиибин!