Субсидиялаах авиабилиэттэргэ эбии 300 мөлүйүөнтэн тахса солкуобай көрүллүөҕэ

РФ Бырабыыталыстыбата чэпчэтиилээх субсидиялаах билиэттэр ороскуотун толуйууга өссө эбии 300 мөлүйүөнтэн тахса солкуобайы ыытыаҕа. Ити иннинэ бырабыыталыстыба маннык сыалларга эбии 1,4 млрд солкуобайтан тахса үбү-харчыны көрбүтэ.

Дойду ыраах сытар уонна уустук суоллаах оройуоннарын дойду атын эрэгийиэннэрин кытта тырааныспарынан ситимнээһин бырабыыталыстыба үлэтин  соруктарыттан биирдэстэрэ. Быйыл маннык маршруттарынан сырыылары оҥорор авиахампаанньалар ороскуоттарын толуйууга өссө эбии 306,9 мөл. солкуобайтан тахса үп-харчы көрүллүөҕэ. Тустаах дьаһалга РФ Бырабыыталыстыбатын бэрэссэдээтэлэ Михаил Мишустин илии баттаата.

Эбии үбүлээһин суотугар өссө 44 тыһыынчаттан итэҕэһэ суох киһи чпэчтиилээх билиэттэринэн туһаныаҕа.  Бырагыраама 2018 сыллаахха үлэтин саҕалаабыта, барыта 82 маршруту хабар, ол иһигэр Москва, Санкт-Петербург, Сочи, Омск, Новосибирск, Екатеринбург уонна Арассыыйа атын куораттарыгар көтүүлэри киллэрэн туран.

Анал тарыыптарынан чэпчэтиилээх билиэттэринэн 23-гэр диэри саастаах гражданнар, 55 саастарын ааспыт дьахталлар, 60 саастарын ааспыт эр дьон, I группалаах инбэлииттэр, инбэлиит оҕолор, ону тэҥэ элбэх оҕолоох ыаллар туһаналлар.