Субуотаҕа ардыыр, түүн тоҥоруу түһэрэ сабаҕаланар

Бу күннэргэ өрөспүүбүлүкэ соҕуруу, киин уонна хотугулуу-илиҥҥи оройуоннарыгар +30 кыраадыска тиийэ сылыйара күүтүллэр. Ол эрээри, нэдиэлэ бүтүүтэ биллэрдик тымныйыа.

Күн-дьыл туруга хайдах буоларын туһунан СИА-ҕа УГМС метеорологическай уонна агрометеорологическай кэтээн көрүү отделын начаалынньыга Саргылана Никитина кэпсээтэ.

«Ыам ыйын 28-29 күннэригэр Монголияттан сылаас салгын киирэн, салгын температурата +25…+30 кыраадыска тиийэ соҕуруу, киин уонна хотугулуу- илин оройуоннарынан биллэрдик сылыйыа. Онуоха Забайкальеттан циклоннар киирэннэр, соҕуруулуу-арҕаа, арҕаа уонна Өлүөнэ алын тардыытынан ардах, ардыгар этиҥнээх ардах түһэрэ, тыал күүһүрэрэ күүтүллэр. Тымныы фронт хотугулуу-арҕаа оройуоннарга инчэҕэй хаары аҕалыа», — диэн Саргылана Никитина иһитиннэрдэ.

Бээтинсэттэн тымныы фронт киин оройуоннарга дьайыаҕа. Дьокуускайга +12…+14 кыраадыска диэри сөрүүдүйэр. «Өрөбүл күннэргэ Забайкалье циклона соҕуруулуу-арҕаа уонна киин оройуоннарга тахсыаҕа. Онон бу оройуоннарга субуотаҕа уонна өрөбүлгэ +13 кыраадыска тиийэ сөрүүн күн-дьыл буолара, ардах түһэрэ күүтүллэр. Субуотаҕа түүн тоҥороро сабаҕаланар», — диэн Саргылана Никитина эттэ.