Субуотаҕа «ЭкоНетворкинг-субботник: делаем добро вместе» субуотунньукка ыҥыраллар

Бэс ыйын 14 күнүгэр, субуотаҕа «ЭкоНетворкинг-субботник: делаем добро вместе» диэн тэрээһин чэрчитинэн Дьокуускай куораты ыраастааһыҥҥа улахан субуотунньук ыытыллар. Тэрийээччилэринэн «Синет Спарк» аһымал пуонда  уонна «Якутсэкосети» өйөбүлүнэн урбаанньыттар ИП Матвеева И.И, уонна Е.П.Ефремова көҕүлээһиннэринэн ыытыллар. Бу туһунан тэрийээччилэртэн биирдэстэрэ Нюргуяна Ефремова санаатын үллэһиннэ:

-«Мусору нет» диэн бырайыак туһунан кылгастык кэпсиир буоллахха, «Синет Спарк» аһымал пуонда өйөбүлүнэн 2020 сылтан ыытыллар. Биһиги биир сезоҥҥа куораты, куорат таһын ыраастааһыҥҥа икки-үс субуотунньугу тэрийэбит.  Быйыл бу иккис суобуотунньукпут буолуохтаах. Бастакыбыт ыам ыйын 18 күнүгэр буолбута. Үһүс субуотунньугу атырдьах ыйыгар былааннанар. Манна ким баҕалаах кэлэн кыттыан сөп. Ити ыйыллыбыт сигэнэн киирэн суруйтараллар.

Биһиги оптуобус сакаастыыбыт. Бөх хомуйар кууллары, бэрчээккилэри барытын биэрэбит. Бу субуотунньукка араас куонкурустары тэрийэбит, волонтердарбытыгар интэриэһинэй буоллун диэн оонньуулары. куонкурустары толкуйдуубут. Кыайбыт дьоммут бириискэ тиксэллэр. Бастакы субуотунньукка хамаанданан арахсан бириэмэҕэ ким төһө элбэх бөҕү хомуйбутунан күрэхтэһиини тэрийбиппит. Иккис сырыыбытыгар «Эко — нетворкинг» диэн толкуйдаатыбыт. Куораты ыраастыан, тупсарыан баҕалаахтары биир сиргэ түмэн билиһиннэрэр соруктаах буолар. Биһиги өттүбүтүттэн эбиэс, ас-үөл баар буолар. Кыттааччылар эмиэ уулаах, өйүөлээх кэлэллэр. Маны сэргэ сынньалаҥ быыһыгар мээчиктиэхпит, йогалыахпыт. Субуотунньук күн аҥаара буолуоҕа. Көхтөөх кыттыыны ыларгытыгар ыҥырабын!

https://forms.gle/PoFWDhGLta2Yodu16