Судаарыстыба көмөтө – идэ сайдыытыгар суолу арыйар

Удачнай куорат олохтооҕо Мария Удальцова социальнай хантараак көмөтүнэн кыра хампаанньаларга юридическай өҥөнү оҥорор ситиһиилээх биисинэс тэриннэ, диэн Удачнай куорат дьаһалтатын пресс-сулууспата иһитиннэрэр.

2023 сыл атырдьах ыйыгар Мария Юрьевна судаарыстыбаттан өйөбүлү ылан, юридическай хос арыммыт. Кини үлэтин түргэнник тэрийбит: хампаанньаларга дуогабар оҥорорго, претензиялары уонна ирдэбил суруктары бэлэмнииргэ, каадыр докумуоннарын ыытарга, итиэннэ ис докумуоннары сөпкө толорорго көмөлөһөр.

Судаарыстыбаттан көрүллүбүт 350 тыһыынча солкуобай кэриҥэ үп-харчы килийиэннэри хаачыстыбалаахтык өҥөнөн хааччыйарга аналлаах тэриллэри уонна бырагыраамалары атыылаһарга анаммыт. Социальнай хантараак Марияҕа бэйэтин дьыалатын саҕалыырыгар көмөлөстө уонна бырагыраама дьоҕус биисинэһи сайыннарыан баҕалаахтарга туһалааҕын көрдөрдө.