Судаарыстыбаннай баһаарынай сулууспа үлэһиттэрэ Үөһээ Бүлүү улууһугар көмөҕө бардылар

Үөһээ Бүлүү улууһугар 107687 га иэннээх сиргэ 6 ойуур баһаара баар. Ойуур баһаарын утары 327, ол иһигэр 95 олохтоох киһи охсуһа сылдьар.

Бу улууска ойуур баһаарын балаһыанньата билигин да тыҥааһыннаах диэн СӨ Гражданскай оборуона уонна нэһилиэнньэ олоҕун куттала суох буолуутун министиэристибэтэ иһитиннэрэр.

СӨ судаарыстыбаннай баһаарынай сулууспата айылҕа содулун утары охсуһарга анаммыт күүстэрин уонна кыаҕын элбэтэр үлэни салгыыр. Бэҕэһээ киэһээ эбии 15 киһи Судаарыстыбаннай баһаарынай сулууспа Нам, Хаҥалас уонна Дьокуускай куоракка баар ыстааты таһынан үлэлиир баһаарынайдарын Үөһээ Бүлүү улууһугар ыытта.

Баһаарынайдарга СӨ судаарыстыбаннай баһаарынай сулууспа салайааччытын бастакы солбуйааччыта Анатолий Павлов балаһыанньаны билиһиннэрдэ уонна уоту кытары охсуһааччыларга ситиһиини баҕарда.