Судаарыстыбаннай Дуумаҕа «Хоту үлэтин бэтэрээнэ» диэн ааты олохтуур туһунан этии киллэрдилэр

Дойду хоту оройуоннарыгар уһуннук үлэлээбит дьоҥҥо «Хоту үлэтин бэтэрээнэ» диэн ааты иҥэрэр туһунан этии киирдэ. Маннык саҥа статуһу олохтуур көҕүлээһини Судаарыстыбаннай Дуума Гражданскай уопсастыбаны сайыннарыы, уопсастыбаннай уонна итэҕэл түмсүүлэрин боппуруостарыгар кэмитиэтин салайааччыта, «Сиэрдээх Арассыыйа» фракциятын салайааччытын бастакы солбуйааччы Яна Лантратова киллэрдэ, диэн ТАСС суруйар.

«Үлэ бэтэрээннэригэр олохтоммут бары чэпчэтиилэр, ханнык эрэгийиэҥҥэ олороллоруттан тутулуга суох, толору көрүллүөхтэрэ. Бу ааты  Хоту оройуоннарыгар үлэ ыстаастара 35 сылтан итэҕэһэ суох эр дьоҥҥо, оттон дьахталларга — 30 сылтан итэҕэһэ суох буоллаҕына, наҕараадаларынан ураты өҥөнү бигэргэтэр ирдэбилэ суох иҥэриэххэ наада», — диэн Лантратова чуолкайдаата.

«Хоту үлэтин бэтэрээнэ» диэн ааты олохтуур туһунан этиилээх сурук Үлэҕэ уонна социальнай көмүскэлгэ миниистир Антон Котяковка ыытылынна. Дьокутаат бэлиэтээбитинэн, билиҥҥи сокуонунан «Үлэ бэтэрээнэ» аат үлэ ыстаастара 20 сылтан итэҕэһэ суох дьахталларга, оттон 25 сылтан итэҕэһэ суох эр дьоҥҥо, ураты үлэҕэ өҥөлөөх буоллахтарына иҥэриллэр. Бу ааты сүгэр дьоҥҥо хас да социальнай өйөбүл миэрэтэ көрүллэр: биэнсийэлэр уонна босуобуйалар, ый аайы төлөнөр харчынан төлөбүрдэр, дьиэнэн хааччыйыы, ОДьКХ өҥөлөр төлөбүрдэрин хоромньутун толуйуу, ону таһынан мэдиссиинэ көмөтө, ол иһигэр тиис олордуута. Итини таһынан, сорох эрэгийиэннэргэ эрэгийиэннээҕи таһымнаах үлэ бэтэрээнин аатын иҥэриэххэ сөп. Ол да буоллар, дбокутаат бэлиэтээбитинэн, гражданин РФ атын субъегар көстөҕүнэ, сөптөөх чэпчэтиилэргэ уонна социальнай өйөбүл миэрэлэригэр быраабын сүтэрэр. «Ити сибээстээн, мин ааппар Хоту үлэһиттэрин үлэлэрэ кырдьыга суохтук сыаналанарыттан долгуйбут гражданнартан туруорсуулар куруук киирэллэр», — диэн Лантратова бэлиэтээтэ.