Судаарыстыбаннай уонна муниципальнай тэрилтэ үлэһиттэригэр аналлаах саха тылын кууруһа саҕаланна

Бүгүҥҥүттэн М.К.Аммосов аатынан Хотугулуу-Илиҥҥи федеральнай университет Арассыыйа Хотугулуу-Илиҥҥи норуоттарын тылларын уонна култуураларын үнүстүүтүгэр “Саха тыла судаарыстыбаннай салайыы эйгэтигэр” куурус саҕаланна.

Тэрээһин аһыллыытыгар Бырабыыталыстыба бэрэссэдээтэлин солбуйааччы Сергей Местников: “Манна судаарыстыбаннай, муниципальнай эйгэ араас таһымнаах үлэһиттэрэ, исписэлиистэрэ, салаа салайааччылара кытталлар. Күннэтэ биһиги төрөөбүт тылбытынан сөпкө саҥарыахтаахпыт, туттуохтаахпыт, докумуону толоруохтаахпыт. Таһыммытын үрдэттэхпитинэ эрэ төрөөбүт тылбытын харыстаан инники көлүөнэҕэ хаалларыахпыт.

Бу күннэргэ ылбыт билиигитин уһаппакка-кэҥэппэккэ тута туттуҥ, биир идэлээхтэргитин кытта үллэстиҥ. Оччоҕо эрэ киһи өйүгэр хатанан хаалар, туһалыыр. Бииргэ үлэлиир дьоҥҥут кэлэн үөрэнэллэригэр ыҥырыҥ. Сэминээр кэнниттэн үлэни өссө тупсарар туһугар санааҕытын үллэстиҥ” – диэн эттэ.

Арассыыйа Хотугулуу-Илиҥҥи норуоттарын тылларын уонна култуураларын үнүстүүтүн дириэктэрэ Гаврил Торотоев иһитиннэрбитинэн, кууруһу Арассыыйаҕа собус-соҕотох саха тылын истилиистикэтин уонна нууччалыы-сахалыы тылбаас хаапыдырата салайан ыытар. “Атын өрөспүүбүлүкэлэр биһигини ордугургуу саныыллар. Биһиги тылбааһы үрдүк таһымҥа тутан илдьэ кэллибит. Саха сиригэр элбэх хамсааһын саҕаланна. Холобур, тэрилтэлэрбит аатын икки тылынан суруйар, ону ирдиир буолан эрэбит. Аны 2023 сыллахха С.В.Местников салайар тиэрмин хамыыһыйата тэриллибитэ. Хамыыһыйаҕа араас эйгэ үлэһиттэрэ киирэллэр. Биир сүбэнэн улахан үлэни ыыта сылдьабыт. Ол да иһин биһиги үлэбитин атын өрөспүүбүлүкэлэр сэҥээрэллэр” – диэн бэлиэтээтэ.

Үнүстүүт преподавателлэрэ сахалыы сөпкө  саҥарары таһынан, докумуону, быраабыланы толору тутуһан суруйары кэпсиэхтэрэ, тылбаас, тиэрмин да эйгэтин билиһиннэриэхтэрэ. Истээччилэр куурус түмүгүнэн, 72 чаас үөрэммиттэрин туоһулуур дастабырыанньалары тутуохтара.

Былырыыҥҥы бастакы тэрээһиҥҥэ 70-тан тахса киһи кыттыбыт. Быйылгы бастакы сэминээргэ номнуо 50 киһи суруйтарбыт. Илин эҥээр, хоту, Бүлүү бөлөх улуустарыттан уонна куорат судаарыстыбаннай, муниципальнай эйгэтиттэн үөрэх, култуура, сонуну киэҥник тарҕатар ситим, судаарыстыбаннай сулууспа тэрилтэлэриттэн кэлэн үөрэхтэрин саҕалаатылар. Быйыл барыта биэс сэминээри ыытары былаанныыллар.