Судаарыстыбаннай юридическай бюролар уонна албакааттар инбэлииттэргэ босхо юридическай көмөнү оҥоруохтара

Ил Түмэн 13-с уочараттаах пленарнай мунньаҕар норуот дьокутааттара босхо юридическай көмө оҥоруу туһунан сокуоҥҥа уларытыылары киллэрии туһунан сокуон бырайыагын көрдүлэр.

Сокуон барылын норуот дьокутааттара Александр Корякин, Афанасий Владимиров, Иван Луцкан көҕүлээһиннэринэн киллэрилиннэ. Сокуон барыла федеральнай сокуоҥҥа сөп түбэһиннэрэн оҥоһулунна.

Санаттахха, кулун тутар 1 күнүттэн реабилитацияҕа уонна абилитацияҕа сылдьар инбэлииттэргэ өҥө оҥорор туһунан федеральнай сокуон күүһүгэр киирбитэ. Ол курдук, реабилитацияҕа уонна абилитацияҕа сылдьар инбэлииттэргэ босхо юридическай көмөнү судаарыстыбаннай юридическай бюролар уонна албакааттар оҥорор буолуохтара.

Ону таһынан, босхо юридическай өҥөнү үс уонна онтон элбэх оҕолоох төрөппүттэр туһанар бырааптаналлар. Ити курдук, федеральнай сокуонунан босхо юридическай көмөнү судаарыстыбаннай юридическай бюролар уонна албакааттар өҥө оҥорор испииһэктэрэ кэҥээн биэрэр, чуолаан сууттарга, судаарыстыбаннай уонна муниципальнай уорганнарынан интэриэстэрин көмүскүөхтэрэ. Сокуон барыла бастакы уонна бүтэһиктээх ааҕыыга ылылынна.