Судаарыстыбаннас күнүгэр Сергей Местников аһаҕас уруогу ыытта

Бүгүн, балаҕан ыйын 27 күнүгэр, А.Д. Макарова аатынан Култуура уонна ускуустуба кэллиэһэ өрөспүүбүлүкэ Судаарыстыбаннаһын күнүн көрсө Этно-художественнай ускуустуба салаатын 35 сыллаах үбүлүөйүн бэлиэтээтэ. Бэтэрээннэр, учууталлар, выпускниктар уопсай параакка хаамтылар. 

Арассыыйа култууратын үтүөлээх үлэһитэ, СӨ үтүөлээх артыыһа, А.Е. Кулаковскай-Өксөкүлээх Өлөксөй аатынан Судаарыстыбаннай бириэмийэ лауреата Афанасий Федоров мустубут дьону алҕаан, «Алгысчыт» бэлиэни үөрэнээччитигэр Михаил Винокуровка туттарда, оттон Михаил салгыы бэйэтин утумнааччыта Сергей Алексеевка туттарда.

Судаарыстыбаннас күнүнэн, үбүлүөйүнэн кэлэктииби өрөспүүбүлүкэ бырабыыталыстыбатын бэрэссэдээтэлин солбуйааччы Сергей Местников эҕэрдэлээтэ.

«Үгэс буолбут култуура уонна ускуустуба, төрөөбүт тыллар, литература өрөспүүбүлүкэ судаарыстыбаннаһын кытта ситимнээхтэр. Эһиги, кэллиэс устудьуоннара, үүнэр көлүөнэ ортотугар салгыы  норуоппут духуобунай уонна култуурунай нэһилиэстибэтин ситимнии сылдьаҕыт. Бу улахан эппиэтинэс эрэ буолбакка, былааннаргыт олоххо киириилэрэ буолар. Суолгут ситиһиилээх буоллун, үөрэххитигэр, айар дьоҕургутугар ситиһиилэри баҕарабын. Бэтэрээннэргэ уонна учууталларга бэриниилээх, сыралаах үлэлэригэр махталбын тиэрдэбин, үйэлээх, ураты үгэстэри үйэтитиигэ уонна үрдэтиигэ таһаарыылаах үлэҕитин бэлиэтиибин», — диэтэ Сергей Местников.

Үөрэнээччилэр Алексей Кулаковскай-Өксөкүлээх Өлөксөй уонна Платон Ойуунускай айымньыларынан композицияны толордулар.

Бэрэссэдээтэли солбуйааччы аһаҕас уруок ыытта, онно оскуоланы бүтэрэр устудьуоннарга Саха сирэ Арассыыйа састаабыгар киириититтэн саҕалаан, өрөспүүбүлүкэ историятыгар сүрүн түгэннэри, судаарыстыбаннаһы төрүттээччилэри, өрөспүүбүлүкэ күн бүгүҥҥэ диэри сүрүн ситиһиилэрин туһунан кэпсээтэ.

Сиһилии: https://www.sakha.gov.ru/news/12617