Судьуйа Юрий Иванов: «Саха сиригэр фигурнай хаҥкылааһыны, хоккейы сайыннарыахха наада»

Кемеровскай уобаласка ыытылла турар норуоттар икки ардыларынааҕы «Азия оҕолоро»  кыһыҥҥы спортивнай иккис оонньууларга сүрүн судьуйа солбуйааччытынан Юрий Владимирович Иванов үлэлиир.

Кини бу номнуо тохсус оонньууларын көрө-истэ сылдьар эбит. Төрдүс күрэхтэһииттэн сүрүн судьуйа солбуйааччытынан үлэлиир:

— Кыһыҥҥы оонньуулар этэҥҥэ уонна үрдүк таһымнаахтык ыытылла тураллар. Омук дойдуларыттан кэлбит дэлэгээссийэлэр бэйэлэрин тылларынан саҥараллар, онуоха хамаанда, көрүҥ аайы тылбаасчыттар бааллар. Улахан күрэхтэһиилэртэн онтон атын туох даҕаны уратыта суохха дылы. Оонньуулары көрөр-истэр судьуйалар бары уопуттаах дьон — норуоттар икки ардыраларынааҕы, Арассыыйатааҕы категориялаахтар.

— Оонньуулар кэмигэр үҥсүү, протест киирбитэ дуо? Хайдах быһаардыгыт?

— Икки ыйытыы тахса сылдьыбыта, олор сүрүн судьуйаларга тиийбэккэ эрэ этэҥҥэ быһаарыллыбыттара. Ол эрээри, син биир балаһыанньа хайдах, туох буолбута биллэр, онуоха биһиги сүбэлээн биэрбиппит. Биир даҕаны көрүҥҥэ түмүгү көтүрбэтибит, тохтоппотубут. Арай, трамплин нөҥүө ыстаныыга тыалтан сылтаан үс оҕо охтубута. Ону оҕолорго кутталаах диэн атын кыра соҕуска уларыппыппыт.

— Атын дойдулартан судьуйалар бааллар дуо?

— Киргиязияттан үс судьуйа үлэлии кэлбитэ. Хоккейга улахан дьон күрэхтэһиитигэр судьуйалаабыт киһи баар. Итиэнннэ хайаттан түһүүгэ, хайыһарга судьуйалыыр өссө икки киһи баар. Саха сиритэн эмиэ аҕыйах судьуйа кэлбитэ.

— Саха сиригэр кыһыҥҥы көрүҥнэри сайыннарарга туох тиийбэтий?

— Биһиги өрөспүүбүлүкэбитигэр кыһыҥҥы көрүҥнэри сайыннарарга элбэх үп наада. Сэтинньигэ бастакы күүстээх тымныылар түһэллэр, онно оҕону таһырдьа дьарыктаабаккын буоллаҕа. Кыратык тыына-тыына сырыттахха сайдыбаккын, онтон тымныыга оҕону күүскэ тыыннаран дьарыктаатахха ыарытыннараҕын. Онон, дьиэ иһигэр дьарыктанар көрүҥнэри — фигурнай хаҥкылааһыны, хоккейы сайыннарыахха наада дии саныыбын. Таһырдьааҥҥы көрүҥнэринэн дьарыктанар  оҕолор үөрэммэккэ эрэ, куруук сборга сылдьыахтарын наада. Оттон хайалаах сиргэ, Арассыыйа атын эрэгийиэннэригэр, тас дойдуларга дьарыктанар элбэх үбү эрэйэр.

— Сахалиҥҥа ыытыллыбыт оонньуулары кытта тэҥнээтэххэ, бу оонньууларга Саха сирин хамаандатын бэлэмэ хайдах дии санаатыҥ?

— Оҕолор биир таһымҥа сылдьаллар. Маныаха пандемия улаханнык мэһэйдээтэ. Уопсайынан да ыллахха, Саха сирин успуорда пандемияҕа баттанан ылбыта. Аттынааҕы эрэгийиэннэр күрэхтэспит буоллахтарына, биһиэхэ оннук буолбатах этэ. Оҕо күрэхтэстэҕинэ сайдар.

Юрий Владимирович ааспыт күһүнтэн оонньуулар кэмитиэтигэр үлэҕэ киирэн, регламеннары оҥоророго көмөлөспүт, судьуйалары түмэргэ үлэлэспит. Кини эппиэтинэстээх үлэтин быыһыгар оонньуулар хайдах ааһан иһэллэрин бу курдук кэпсээн ааста.