Дьокуускай куорат бааһынай ырыынагар сугун сыаната төһөнүй?

Cир аһын сыанатын билээри бэҕэһээ Дьокуускай куорат бааһынай ырыынагар баран кэллим. Сугуну атыылаһааччы син баар эбит.

Бааһынай ырыынагар сылдьар киһи сир аһа ханна атыылыылларын билэр. Ала-чуо онно тиийэн хаартыскаҕа түһэрэн, ыйыталаһан барбыппар биир атыыһыт: “Блогергын дуо?” – диир уонна бэрт үөрүйэх киһи быһыытынан кэпсэтэн барар.

Олус бөдөҥ, хараара буспут, Алдантан аҕалыллыбыт сугуну атыылыы тураллар. Лиитирэ аҥаара – 350 солк., лиитирэтэ – 700 солк. Сугун барыанньата лиитирэтэ – 800 солк., малина барыанньата – 1700 солк.

Чааһынайдар биэстии, уоннуу лиитирэлээх биэдэрэнэн атыылыыллар. 10 лиитирэлээх сугуну 6-7 тыһ. атыылыыбыт диэн биллэриилэри таһаараллар.

Ити курдук, лиитирэ сугун сыллата 100 солк. үрдүүр эбит. Иллэрээ сыл 500 солк. этэ.