Суһал көмө үлэһиттэрэ эбии төлөбүрү ылыахтара

Мэдиссиинэ үлэһиттэрэ хамнастарыгар эбии социальнай төлөбүрү ылыахтара. Бу туһунан бэҕэһээ, тохсунньу 9 күнүгэр, РФ Бырабыыталыстыбатын бэрэссэдээтэлэ Михаил Мишустин вице-премьэрдэри кытары мунньахтыырыгар иһитиннэрдэ.

Санатан эттэххэ, РФ бэрэсидьиэнэ Владимир Путин ахсынньыга гражданскай уопсастыба уонна киһи быраабын сэбиэтин мунньаҕар мэдиссиинэ өҥөтүн хаҥатарга, хаачыстыбатын тупсарарга, доруобуйа харыстабылын сорох үлэһиттэригэр хамнастарын таһынан эбии төлөбүрү көрөргө эппитэ. Кини этиитинэн, үүммүт сылга мэдиссиинэ сорох үлэһиттэрэ ый аайы 4,5-тан 18,5 тыһыынча солкуобайга диэри социальнай төлөбүрү ылар буолуохтара. Бу туһунан РФ Бырабыыталыстыбатын уурааҕа ахсынньы 31 күнүгэр тахсыбыта.

Уурахха этиллэринэн, бу анал төлөбүрү билигин тиийбэт, ахсааҥҥа баттанар идэлээх исписэлиистэр ылыахтара. Ол курдук, доруобуйа харыстабылын бастакы олугар үлэлии сылдьар быраастар, исписэлиистэр, оройуон балыыһаларын быраастара, ону сэргэ суһал көмө ыстаансыйатын, отделениетын быраастара ылыахтара.

Холобур, улуустааҕы киин, учаастактааҕы балыыһалар быраастарыгар ый аайы 18,5 тыһыынча солкуобай көрүллүөҕэ. Поликлиника, амбулаторнай балыыһалар быраастара — 14,5, суһал көмө ыстаансыйатын, отделениетын быраастара – 11,5 тыһыынча солкуобайы ылыахтара. Итини таһынан гистология, цитология чинчийиитин ыытар исписэлиистэр, улуустарга, поликлиникаларга, амбулаторияларга үлэлии сылдьар орто анал үөрэхтээх исписэлиистэр 4,5 тыһыынча солкуобайтан 8 тыһыынча солкуобайга диэри социальнай төлөбүрү ылар кыахтаныахтара.

Михаил Мишустин бэлиэтииринэн, манна барытыгар бүддьүөттэн 152,4 млрд солкуобай көрүллүбүт. Барыта 1,1 мөлүйүөнтэн тахса киһи бу социальнай төлөбүрү ылар бырааптаах. Мэдиссиинэ тэрилтэлэрин салайааччыларыгар, кинилэр солбуйааччыларыгар бу уураах тарҕаммат.

— РФ Бэрэсидьиэнин этиитинэн бырабыыталыстыба 2025 сылга диэри босхо мэдиссиинискэй көмө бырагырааматын кэҥэтэн турар. Үрдүкү технологиянан оҥоһуллар уонна анал көмөнү элбэттибит. Мэдиссиинэ сорох үлэһиттэригэр хамнастарын таһынан эбии социальнай төлөбүр көрүллүөҕэ. Бу төлөбүр барыларыгар тохсунньуттан саҕалаан төлөнүөхтээх, — диэн бэлиэтиир мунньах кэмигэр премьер-миниистир Михаил Владимирович.

Санатан эттэххэ, мэдиссиинискэй страховкалааһын бырагыраамата быйыл 295 млрд солкуобайынан эбиллибитэ.