«Сулус буолбуппун манна кэлэн биллим…»

81 саастаах Пелагея Петровна Семенова ыраах диэбэккэ, Хаҥалас Нөмүгүтүттэн айаннаан кэлэн, Нерюнгригэ Олоҥхо ыһыаҕар кытта сылдьар.

Кини хомус, тойук күрэстэригэр кытынна. Бөлөҕүнэн  «Хаҥалас Боотур» диэн олоҥхону олоҥхолоотулар.

— Серебряный Бор нэһилиэгин түһүлгэтигэр ыалдьыт буоллубут. Хаҥалас уонна Амма улуустарын дэлэгээссийэлэрин наһаа үчүгэйдик көрүстүлэр, ас-үөл бөҕө.
Ыһыаҕы сөбүлээтим. Нуучча сирэ буоллаҕа дии, олус кыһаллан, тэрийэ сатаабыттар. Хара тыаны солоон, сыалай куораты тута охсор дьон, наһаа үчүгэйдик толкуйдаммыт, мааны түһүлгэни туппуттар. Ити айылҕаны көрөр былаһааккалара наһаа үчүгэй дии. Айылҕата ханна да хатыламмат дьикти эбит. Былыр кыһын гостуруолга кэлэ сылдьыбыппыт, сайыҥҥыта ордук эбит.
Бу кыһын тэлэбиидэнньэҕэ «Эн сулускун!» бырайыакка кыайбытым, дьэ, сулус буолбуппун манна кэлэн биллим. Билбэт дьонум кэлэн кэпсэтэллэр, «эйиэхэ ыалдьыбыппыт» диэн кэпсииллэр.
Ыһыах эйгэтэ олох ураты, онон сыл аайы сылдьа сатыыбын, — диэн кэпсээтэ.