Сулустан Заболоцкай: «Үөһээ Бүлүү улууһун баһылыгын быыбара күрэстэһиитэ тыҥааһыннаахтык барда»

Быйылгы сылга бастакы, тохсунньу 21 күнүнээҕи Үөһээ Бүлүү улууһун баһылыгын талыы быыбара улахан киирсиилээхтик, тыҥааһыннаахтык ааста.

Санатан эттэххэ, Үөһээ Бүлүү улууһун баһылыгын быыбарыгар 4 хандьыдаат – «Биир ньыгыл Арассыыйа» баартыйаттан – Валерий Николаев уонна бэйэлэрэ туруоруммут Семен Михалев, Николай Николаев, Кирилл Софронов кытынна. Быыбар түмүгүнэн Николаев Валерий Валерьевич 4073, ол эбэтэр 49,84% куолаһы, оттон Михалев Семён Анатольевич – 3860, ол эбэтэр 47,23%, Николаев Николай Николаевич – 136, ол эбэтэр 1,66%, Софронов Кирилл Егорович – 35, ол эбэтэр 0,43% ылбыттара.

Саха сирин олохтоохторун улахан сэҥээриитин ылбыт, болҕомтотун тардыбыт Үөһээ Бүлүү улууһун баһылыгын быыбарын туһунан «Биир ньыгыл Арассыыйа» Саха сиринээҕи ситэриилээх кэмитиэтин салайааччыта Сулустан Заболоцкай санаатын үллэһиннэ:

— Үөһээ Бүлүү улууһун баһылыгын быыбара күрэстэһиитэ тыҥааһыннаахтык барда дии саныыбын. Куоластааһын түмүгүнэн «Биир ньыгыл Арассыыйа» бэлитиичэскэй баартыйа туруорбут киһитэ – Валерий Николаев кыайда. Киниэхэ 4073 быыбардааччы, ол эбэтэр быыбарга кыттааччы 49,84% куоластаата. Бу судургута суох кэмҥэ норуот «Биир ньыгыл Арассыыйа» баартыйа хандьыдаатынан сирэйдээн, сарсыҥҥы күҥҥэ эрэллээҕин уонна туруктаах олохтооҕун этэр.

Валерий Николаев быыбардыыр хамыыһыйатынан хандьыдаат быһыытынан регистрацияламмытын учуоттаан, докумуоннара бары сокуон ирдэбилигэр сөп түбэһиннэрэн бэриллибиттэрин уонна хамыыһыйа регистрациялыыртан аккаастыыр төрүөтү булбатаҕын туоһулуур.

Валерий Васильевиһы кыайыытынан эҕэрдэлиибин! Киниэхэ салгыы үлэлииригэр ситиһиилэри баҕарабын. Элбэх үлэ күүтэр – иннибитигэр Бэрэсидьиэн быыбара! Биһиги сорукпут – бэйэлэрин үлэлэринэн-хамнастарынан, үтүө дьыалаларынан уопсастыбаҕа билиниини, аптарытыаты ылбыт эрчимнээх, дьулуурдаах дьону сыалбытын ситиһэргэ түмүү буолар. Биһиги бары төрөөбүт Сахабыт сирэ сириэдийэ сайдарын туһугар бииргэ үлэлиэхтээхпит.