Сулууспалаабатахтары хомуурга ыҥырыы, бэбиэскэни туттарыы бэрээдэгин о.д.а. туһунан быһа эпииргэ кэпсээтилэр

Өрөспүүбүлүкэ байыаннай комиссара Александр Авдонин уонна Илиҥҥи байыаннай уокурук штабын мобилизационнай салаатын начаалынньыга Сергей Голубев бүгүн, алтынньы 1 күнүгэр,  “Саха” НКИХ, «Якутия 24» ханаалларыгар биэриигэ кытыннылар.

Ыытааччы бастакы ыйытыыта “тоҕо хомуурга ыҥырыллыбыт дьон мэдиссиинискэй хамыыһыйаны ааспатый?” диэн буолла. Ыйытыыга Александр Авдонин бу курдук хоруйдаата:

— Хомуур сыллааҕы призывтан ураты тэрээһин. Бу суһал тэтиминэн ыытыллар дьайыы, онон мэдиссиинискэй хамыыһыйа диэн көрүллүбэт. Мэдкөрүү диэн киһи уопсай туругун сыаналыыр көрүү эрэ сокуонунан оҥоһуллар. Байыаннай билиэттээх дьон бары эрдэттэн доруобуйаларын туругунан категорияҕа арахсаллар. Эрдэ ыйыллыбыт туруктарыттан атын көрдөрүүлээх буоллахтарына, ону туһунан быһаарыы ылыллар.

Элбэх ыйытыы бэбиэскэни туттарыы бэрээдэгин туһунан киирдэ. Военком этэринэн, бэбиэскэни байыаннай таҥаһа суох, гражданскай көмөлөһөөччүлэр үксүн туттараллар эбит. 

— Туох даҕаны боломуочуйа туоһулуур докумуон кинилэргэ суох, бэбиэскэ бэйэтэ сөптөөх туоһу буолар. Уулуссаҕа тутан бэбиэскэ туттарыы холобурдара суох, ыҥырыллар байыаннай эбээһинэстээхтэргэ үлэлиир сирдэригэр уонна олорор аадырыстарыгар тиэрдэбит, — диэн кини Авдонин хоруйдаата.

“Баахтанан үлэлиир киһи дьиэтин аадырыһыгар бэбиэскэ кэлбитин билбэт түгэнигэр туох буолар?” диэн ыйытыыга “Командировкаҕа сылдьар киһи бэбиэскэтин үлэни биэрээччитигэр тиксэрэбит» — диэн эттэ.

Илиҥҥи байыаннай уокурук штабын мобилизационнай салаатын начаалынньыга Сергей Голубев ыҥырыллыбыт дьону сэриилэһэргэ бэлэмнээһин туһунан ыйытыыга хоруйдаата:

— Бүгүн хомуурга эрдэ сулууспалаабыт дьону ыҥырабыт, ол эбэтэр кинилэр байыаннай туттууга сүрүн билиилээхтэр, ону өйдүөхтэрин эрэ наада, саҥаттаан үөрэтэр кыһалҕа суох. Билигин хомуур сокуона сулууспалаабатах дьону ыҥырары көҥүллүүр эрээри, оннук кыһалҕа билигин суох, оннук дьону кытта үлэлээбэппит.

“Байыаннай эбээһинэстээх дьахталлар хомуурга түбэһэллэр дуо?” диэн ыйытыыга: «Оннук кыһалҕа суох, ыҥырыллыбаттар», —  диэн Александр Авдонин хоруйдаата.