«Сунгари» эрэстэрээн ыстарааптанна

Ааспыт нэдиэлэ устата Дьокуускай куорат мээрийэтин административнай хамыыһыйата сымыйа кафеҕа, түүҥҥү кулуупка уонна итирдэр утахтары атыылыыр тэрилтэлэргэ сыһыаннаах   21 дьыаланы көрбүтүн туһунан  куорат мээрэ Евгений Григорьев “ВКонтакте” ситимҥэ баар бэйэтин страницатыгар иһитиннэрдэ.

“Бу дьыалалартан 18-гар уопсайа 750 тыһыынча солкуобай суумалаах административнай ыстараап уурулунна. Ол иһигэр «Сунгари» эрэстэрээн хаһаайыттара уопсайа 500 тыһыынча солкуобайга ыстарааптаннылар. Маны тэҥэ, полиция үлэһиттэрэ сокуоннайа суох арыгы атыытын 12 түбэлтэтин арыйбыттар. Уопсастыбаннай миэстэлэртэн 116 киһини араас буруйу оҥоруу иһин полиция учаастактарыгар илдьибиттэр, ол иһигэр 8 киһи — сылаас оптуобус тохтобулларыттан. Бу нэдиэлэҕэ ГАИ үлэһиттэрэ 27 итирик суоппары туппуттар, ол иһигэр холуобунай буруйга тардыллыахтаах 6 киһи – хаһыс да тутуллуута”, — диэн суруйда мээр Евгений Григорьев.