Сунтаар баһылыгын Саҥа дьыллааҕы харыйатыгар 100 оҕо наҕараадаланна

Сунтаарга улуус баһылыгын Саҥа дьыллааҕы харыйата хас биирдии оҕоҕо күүтүүлээх  кэрэ түгэнинэн буолар. Үөрүүлээх бырааһынньыкка  туйгун үөрэхтээх, көхтөөх үөрэнээччилэр кыттыыны ылаллар.

Быйылгы тэрээһиҥҥэ үөрэхтэригэр, общественнай үлэҕэ, спорка, култуура, наука  эйгэтигэр үрдүк ситиһиилээх   100 оҕо ыҥырыллан кыттыыны ылла диэн улуус дьаһалтатын пресс-сулууспата иһитиннэрдэ.

Оҕолор үрдүкү сыанаҕа улуус баһылыга Анатолий Григорьевтан махтал суругу, минньигэс бэлэҕи уонна олус наадалаах планшет тутан, сыллааҕы ситиһиилэрин өрө кынаттаатылар.

«Манна наҕарааданы эрэ туттарыы буолбакка араас көхтөөх оонньуулар ыытылыннылар. Оҕолор «Былааһы кытта сэһэргэһиигэ» дойду инники сайдыытыгар туһуламмыт, маны тэҥэ идэни баһылааһын тула үгүс боппуруостары туруордулар. Түмүккэ, искусство оскуолатын саҥа дьыллааҕы эҕэрдэ мюзикл-представлениетын дуоһуйа көрдүлэр»,- диэн пресс-сулууспа иһитиннэрдэ.