«Сунтаар буоксата» диэн саҥа кинигэ сүрэхтэннэ

Сунтаарга буокса сиэксийэтэ аан бастакытын Сиэйэҕэ тэриллибитэ. Ол курдук, 1959 сыллаахха энтузиаст учуутал, тренер Гаврил Сыромятников баҕалаах оҕолору сүүмэрдээн утумнаах дьарыгы саҕалаабыта. 

Онтон саҕалаан буокса курдук ураты көрүҥ киэҥ түһүлгэлэригэр Сунтаар аата дорҕоонноохтук ааттанар буолбута. «Оччолорго Сиэйэ уола буолла даҕаны, «боксёр» диэн дьаралыктана сылдьыбыттааҕа», —  диэн улуус баһылыга Анатолий Григорьев кинигэ сурэхтэниитин кэмигэр ахтан-санаан ааста.

Маны тэҥэ, улууска буокса сайдыытыгар сүҥкэн  кылаатын киллэрбит киһинэн Арассыыйа уонна Саха сирин үтүөлээх тренерэ Анатолий Афанасьев буолар. Кини дьаныардаах үлэтин түмүгэр ааттаах-суоллаах боксёр, кикбоксер кыргыттар Оксана Васильева, Мария Кривошапкина уонна Лидия Андреева иитиллэн тахсыбыттара.

Оттон кэлиҥҥи кэмҥэ Элгээйиттэн төрүттээх Михаил Варламов  профессиональнай буокса турнирдарын баһылыыр. Кини «Вызов Севера» турнир  кыайыылааҕынан буолар.

65 сыллаах үлэ үтүмэн ситиһиилэрин үйэтитэр сыаллаах успуорт бэтэрээнэ Игорь Максимов көҕүлээһининэн саҥа кинигэ хомуллан, суруллан киэҥ эйгэҕэ сүрэхтэннэ. Сүрүн редакторынан Владислав Коротов үлэлээтэ. Кинигэ тахсыытын улуус дьаһалтата үбүлээтэ.

Сунтаар улууһун дьаһалтатын  пресс-сулууспата