Сунтаар Далбар Хотуна «Гранд Голд» үрдүк ааты ылары ситистэ

Сунтаар — Олоҥхо дойдутун Хаданыттан уонна Бүлүүчээн Мэйигиттэн төрүттээх Екатерина Петровна Иванова — Дойдууна Москваҕа «Жемчужина России», Ростов на Дону «Жемчужина Мира» муода уонна кэрэ сэбэрэ бүтүн норуоттар икки ардыларынааҕы күрэстэригэр Дыгыйа уонна Мария Шиванэ таҥаһын кэтэн саха дьахтарын уобараһын арыйда.

Маныаха дьүүллүүр сүбэ кинини уратытык бэлиэтии көрөн, «Гранд Голд» үрдүк ааты иҥэрбиттэрэ. Ростов куоракка «Гранд Персона» глянцевай сурунаалга бэчээттэнэн тахсарга 100.000 солк. наҕараадаҕа тиксэн, бу сурунаалга аан дойду сулустарын, бэлиитиктэрин кытта тахсыаҕа.

Сурунаал эрэдээктэр бэйэтинэн дьүүллүүр сүбэҕэ олорон талбыт үрдук чиэс, бу кэннэ элбэх киһи хас саастааҕын? Тугу дьарыгырарын? Дьиэ кэргэнин умсугуйа ыйыталаспыттарын бу баардыы өйдүүр. Дойдууна 68 саастаах олус көрсүө, элэккэй далбар хотун. Кини Москваҕа, Владивостокка, Кытайга кэлэр-барар дьону үөрэ көрсөр урбаанньыт. Ону таһынан Владивостокка агент по недвижимости, Кытайга «Лечебный Тур» арыйан үлэлэтэр, 2016 сылтан саха дьонугар  мэдиссиинискэй статустах Хунчунь куорат суолун арыйбыта, 2018 сылга Кореяҕа эдэр ыччаты үлэҕэ ыҥыртаан, элбэх саха оҕолоругар киэҥ суолу арыйбыта.

Дойдууна: «18 үйэтээҕи баай дьахталлар кэппит таҥастарын 21 үйэҕэ аан дойду подиумугар таһаарыы диэн күүстээх ис туругум баҕарар дии… Мин ийэм, аҕам баҕа санаалара туолан эрэр. Ийэм мин эһиги курдук үөрэхтээҕим буоллар, аан дойдуга батан олоруом суоҕа этэ диирэ. Кэс тыл хаалларбыт эбит. Барыта сибээстээх буолан тахсар дии. Аны атырдьах ыйыгар Сочига дизайнердар таҥастарын кэтэн муода көрдөрүүтүгэр ыҥырыллан сүргэтэ көтөҕүллэн олорор. Мин киниэхэ махталым эмиэ олус улахан, «Аар Кудай» күрэскэ кытта сырыттахпына Москваттан кэлэн түһүлгэни киэргэппиттээх, көмө буолбуттаах. Ситиһиилэри!».

Тускулаана Горохова-Кобельянова