Сунтаар: “Дойдубар, дьоммор ситиһии көтөллөнөн”

Сунтаарга тохсунньу 24 күнүгэр үгэскэ кубулуйбут “Дойдубар, дьоммор ситиһии көтөллөнөн” диэн ааспыт сылга култуура эйгэтигэр бастыҥ, ситиһиилээх дьону чиэстиир дьоро түһүлгэ буолан ааста.

Быйылгы норуоттар икки ардыларынааҕы, дойду, өрөспүүбүлүкэтээҕи араас күрэстэр кыайыылаах дьонун ахсаана 77 буолла, балар истэригэр кэллэктииптэр эмиэ бааллар. Ол курдук, “Бастыҥ уран уустар”, “Саха норуотун уус-уран айымньытын бастыҥнара”, “Муусука эйгэтин бастыҥнара”, “Ырыа кэрэ эйгэтин бастыҥнара”, “Үҥкүү-битии бастыҥнара”, “Тыл сүмэтин бастыҥнара” диэн көрүҥнэринэн ситиһиилээх дьон анал бэлиэни уонна 2023 сыллаах “Дойдубар, дьоммор ситиһии көтөллөнөн” тэрээһин халандаарын бэлэх туттулар.

Бырайыак ааптара Тускулаана Горохова-Кобельянова Сунтаар улууһун култууратын уонна айылгытын салалтатын салайааччыта:

— Аан бастаан култуура салайааччытынан үлэлии киирэн баран култуура эйгэтин дьонун чиэстиир тэрээһин суоҕун бэлиэтии көрөн, бу дьоро түһүлгэни төрүттүүргэ санаммытым. Бастаан сүүрбэ иһинэн киһини чиэстээбит буоллахпытына, сыл аайы ситиһиибит элбээн иһэрэ үөрдэр.  2022 сыл түмүгүнэн  70-ча киһи кыайыынан кынаттанна. Аны бу тэрээһин ахсын ситиһиилээх дьоммут мэтириэттээх халандаар, постер оҥорор үгэстээхпит. Бу тэрээһиммитигэр ааспыт  сылга ыыппыт улахан күрэстэрбит: сылы быһы ыытыллыбыт “Олоҥхо дойдутун оһуордаах оонньуута” бэстибээл, Ангелина Файрушина 55 сылыгар аналлаах өрөспүүбүлүкэтээҕи  “Улуу таптал — Сахам сирэ” клип күрэһин түмүктэрин таһаардыбыт. Кыайыылаахтары эҕэрдэлээтибит. Быйылгы тэрээһини Юрий Очосов  дириэктэрдээх, Елена Амонова уус-уран салайааччылаах «Партизан» НАТК сорудахтаан олус бэркэ ааста. Бу тэрээһиҥҥэ аан дойду, дойду,  норуоттар икки ардыларынааҕы күрэстэр кылааннара, үрдэллэрэ,  өрөспүүбүлүкэ күрэстэрин кылааннара чиэстэнэллэр, — диэн санаатын үллэһиннэ.

Хаһыс да сылларын субуруччу бэлиэтэнэр дьонунан  «Алгыс” бэтэрээннэр кулууптара 6 бэлиэлэрин, тойуксут, олоҥхоһут, Сунтаар талааннаах ыччата Айсен Федоров 5 төгүлүн ылаллар. Буоларын курдук, Сунтаар дьоно ордук  фольклор көрүҥнэригэр ситиһиилээх буолаллар. Быйыл саамай элбэх ситиһиилээх дьонноох нэһилиэгинэн Бордоҥ нэһилиэгэ буолла.  Бордоҥтон төрүттээх 10 киһи  “Дойдубар, дьоммор ситиһии көтөллөнөн” бэлиэтин тутан үөрүү кынаттаннылар. Аҥардас “Айыллаан” КК 5 бэлиэни тутта. Бу күн дьиэ кэргэнинэн эмиэ бэлиэ туттулар. Ол курдук, Сунтаартан Сергеевтэр ийэлэрэ, аҕалара, оҕолоро бэлиэтэннилэр. “Дойдубар, дьоммор ситиһии көтөллөнөн” бырайыак култуура эйгэтигэр айа-тута, үлэлии-хамныы сылдьар дьону кыайыыга-хотууга көтүтэр, кынаттыыр бырайыак буолар.

Мира Афанасьева, Сунтаар