Сунтаар икки нэһилиэгэр саҥа баһаарынай чаастар эбийиэктэрин тутуохтара

Сунтаар оройуонун Тойбохой уонна Кириэстээх сэлиэнньэлэригэр быйыл аныгылыы оҥоһуулаах баһаарынай чаастар эбийиэктэрин тутуута саҕаланыа.

Ол туһунан олунньу 14 күнүгэр Гражданскай оборуона дьыалаларыгар уонна нэһилиэнньэ олоҕор-дьаһаҕар куттала суох буолууну хааччыйыыга министэристибэтигэр иһитиннэрдилэр. Саҥа эбийиэктэр нэһилиэнньэҕэ куттала суох буолууну хааччыйыа уонна социальнай инфраструктура эбийиэктэрин таһымын үрдэтиэ. Сунтаар оройуонугар эбийиэктэр тутуллар миэстэлэрин  Гражданскай оборуона дьыалаларыгар уонна нэһилиэнньэ олоҕор-дьаһаҕар куттала суох буолууну хааччыйыыга миниистирин солбуйааччы Никита Павлов кэрийэ сылдьан көрдө. Ол кэннэ баһаарынай чаастар үлэһиттэрин састааптарын кытта көрүстэ.

«Саҥа баһаарынай чаастары тутуу —  бу олохтоохторго куттала суох буолууну хааччыйыыга дьоһун хардыы. Эбийиэктэр инникитин ыксаллаах быһыыны-майгыны туоратыы тиһигэр биир бастыҥ салаатынан буолуохтара диэн эрэнэбит», — диэн бэлиэтээтэ миниистир.