Сунтаардар Кыайыыны алгыһынан түстээтилэр

Өрөспүүбүлүкэтээҕи Оһуокай уопсастыбата хас өрөбүл ахсын алгыстаах түһүлгэни тэрийэр.

Олунньу 2 күнүгэр куоракка олорор Сунтаар улууһуттан төрүттээх  дьоҥҥо Кыайыы 80 сылын көрсө уонна байыаннай дьайыы байыастарыгар кыайыыны түстээн киэҥ түһүлгэни төрүттээтилэр. Дьокуускай куоракка сунтаардар түмсүүлэрин салайааччы, «Барҕарыы» фондатын бэрэссэдээтэлэ, Ил Түмэн  депутата А.В. Постников, Ил Түмэн  депутата А.Ю.Николаев, СӨ социальнай харысхал сулууспатын үтүөлээх үлэһитэ, судаарыстыбаннай сулууспа туйгуна, сунтаардар түмсүүлэрин биир көхтөөх салайааччыларыттан биирдэстэрэ А.В.Степанова Оһуокай түмсүүтүн тэрээһиннээх, Кыайыыны түстүүр оһуокайы тэрийбиттэринэн эҕэрдэлээн туран, 98 саастаах Аар Дархан этээччи Егор Михайловичка эҕэрдэ сурук туттардылар уонна харчынан материальнай көмө оҥордулар. Егор Михайлович алгыстаах түһүлгэтигэр оһуокайдастылар.

Сунтаар күнүгэр аналлаах оһуокайга улуу киһибит, Аар Тайҕа ырыаһыта, САССР искусствотын үтүөлээх деятелэ С.А.Зверев Кыыл Уола төрөөбүтэ 125 сыллаах үбүлүөйдээх тэрээһинин ыыта кэлэ сылдьар  улуустааҕы культура уонна духуобунас сайдыытын управлениетын начальнига, оһуокай улуустааҕы түмсүүтүн салайааччыта С.Д.Омукова этээччилэрин кытта киэҥ түһүлгэни төрүттээн, куоракка олорор биир дойдулаахтарын санааларын көтөхтүлэр. Ол курдук Дархан этээччилэр СӨ Ил Дархан оһуокайга стипендиата Лариса Иванова, Светлана Зедгенидзева, үтүөлээх этээччилэр Дмитрий Кондратьев, Саргылаана Омукова о.д.а. киэҥ түһүлгэни төрүттээтилэр.

Маннык тэрээһиннэр бар дьону сомоҕулуурунан уратылаах. Ырыаһыттар Николай Омуков, Евгения Игнатьева, Елена Кириллина, СӨ үтүөлээх артыыһа Владимир Павлов иэйиилээх ырыаларынан дьон сүргэтин көтөхтүлэр. Өрөспүүбүлүкэҕэ улуу киһибит Сергей Афанасьевич Зверв үбүлүөйэ сахалыы оһуокай, тойук, олоҥхо, үҥкүү сайдарыгар төһүү кынат, холобур буолар.
Кэлэр өрөбүлгэ Эҥсиэли хочотуттан оһуокайдьыттар киирэн алгыстаах түһүлгэни төрүттүөхтэрэ.

Марта Николаева