Сунтаар сэлиэнньэтигэр үс оҕолоох дьиэ кэргэн өлбүтүнэн холуобунай дьыала тэрилиннэ

Сунтаар сэлиэнньэтигэр биэс киһи өлбүтүнэн «икки уонна онтон элбэх киһини сэрэҕэ суохтан өлүүгэ тиэрдии» диэн ыстатыйанан холуобунай дьыала тэрилиннэ. Бу туһунан Саха сиринээҕи Силиэстийэлиир кэмитиэтин пресс-сулууспата иһитиннэрэр.

Силиэстийэ чахчыларынан, сарсыарда Сунтаар сэлиэнньэтин Хатыҥнаах уулуссатыгар баар чааһынай дьиэҕэ уот турбут. Баһаары бохсубуттарын кэннэ, быһылаан буолбут сиригэр 2018, 2020 уонна 2023 сыллаах төрүөх үс оҕо уонна кинилэр төрөппүттэрин – 1997 сыллаах эр киһи уонна 1993 сыллаах дьахтар өлүктэрэ көстүбүттэр.

Билигин силиэдэбэтэлинэн силиэстийэ ыытыллар. Быһылаан буолбут сириттэн дьон тоҕо өлбүтүн уонна быһылаан туохтан тахсыбытын быһаарарга суолталаах биридимиэттэр ылылыннылар.

Быһылаан туохтан тахсыбытын сиһилии быһаарар сыалтан, алдьархай тахсыбыт сиригэр криминалистар айаннаан иһэллэр.

Силиэстийэ хаамыыта силиэстийэлиир управление салайааччыларынан хонтуруолланар.