Сунтаар тутааччылара бастакынан Өймөкөөҥҥө үлэлии кэллилэр

Бу күннэргэ өрөспүүбүлүкэ улуустарын муниципальнай тэриллиилэрин салалталарын кытта улуустааҕы суһал ыстаап чилиэннэрэ тиһигин быспакка сибээстэһэ олороллор.

Бу үлэ түмүгэр өрөспүүбүлүкэ уонтан тахса муниципальнай оройуоннарыттан тутуу биригээдэлэрэ иһэллэр. Ол курдук, Ньурба, Сунтаар, Үөһээ Бүлүү, Бүлүү, Горнай, Хаҥалас, Нам, Уус Алдан, Мэҥэ Хаҥалас, Амма, Таатта, Чурапчы уо.д.а. улуустартан уонна Дьокуускай куораттан тутуу биригээдэлэрэ халаантан эмсэҕэлээбит нэһилиэктэргэ көмөнү оҥорорго ыҥырыыны ылынан, анаан көмөлөһө иһэллэр.

— Бүгүҥҥү сорукпут – хас биирдии эбийиэккэ тахсыбыт алдьархайы төһө кыалларынан түргэнник сыаналаан, чөлүгэр түһэрэр үлэни тэтимнээхтик ыытыы. Улуустартан иһэр тутуу биригээдэлэрэ наадалаах тутууга туттар тэриллэрин, уматыктарын уонна ыйдааҕы астарын-үөллэрин бэйэлэрин кытта илдьэ иһэллэр. Волонтердар быһыытынан улуустартан кэлэр биригээдэлэр босхо үлэлиллэр. Олохтоох салалта кинилэргэ хонор сиринэн уонна күүстээх үлэ кэмигэр сылаас аһынан хааччыйар. Онон бу күннэргэ тутуу биригээдэлэрин үлэнэн хааччыйыы бары боппуруостарын барытын быһаара сылдьабыт. Хамыыһыйалар олорор дьиэлэри көрө-истэ сылдьан, көмөҕө ордук наадыйар нэһилиэк олохтоохторун быһааран, тутуу биригээдэлэрин кинилэргэ сыһыарыахтара, — диэн улуус баһылыгын 1-кы солбуйааччы Алексей Федотов иһитиннэрдэ.

Улуустааҕы «Северная заря» уонна «Хотугу сардаҥа» хаһыаттар уопсастыбаннай кэрэспэдьиэннэрэ Тамара Винокурова иһитиннэрбитинэн, бөлүүн өрөспүүбүлүкэ улуустарыттан көмөҕө иһэр тутааччылар биригээдэлэриттэн «бастакы хараҥаччы» — Сунтаар улууһун тутааччыларын волонтер-биригээдэтэ Өймөкөөн нэһилиэгэр кэллилэр.

— Мин тутуу биригээдэтин салайааччыта, Алквиад Иванов аатынан олимпийскай эрэллэрин бэлэмниир успуорт оскуолатын дириэктэрин солбуйааччы Семен Павловы кытта кэпсэттим. Тоҕус киһилээх тутааччы биригээдэтин састаабыгар улуустааҕы дьаһалта уонна үөрэх салаатын үлэһиттэрэ бааллар. Волонтердар “син уһуннук айаннаан кэллибит.

Паромнар күүттэриилээх соҕус буоллулар.  Айаннаан иһэн Өймөкөөн кэрэ айылҕатын аан бастаан көрөн сөҕөн-махтайан кэллибит. Олох соҕуруу Абхазия диэн сымыйа курдук көһүннэ” диэн санааларын үллэһиннилэр. Сунтаар тутааччылара “бары баҕа өттүбүтүнэн кэллибит, тутууга сыһыаннаахпыт. «Саха сатаабатаҕа суох» диэн санаанан салайтаран, бары үлэҕэ эппиэтинэстээхтик сыһыаннаһыахпыт” дииллэр. Тутааччылар кэлэн сынньанан, аһаан баран, улуус баһылыгын 1-кы солбуйааччы Алексей Федотовы кытта көрсөн, туох үлэ барыахтааҕын билистилэр. Онон сарсыҥҥыттан сунтаардар бастакынан чөлүгэр түһэрии үлэтигэр күүстээхтик ылсыахтара, — диэн бэлиэтээтэ Тамара Винокурова.

Бүгүн тутуу матырыйаалын толору тиэммит урбаанньыт Федор Филиппов тэрийэн ыыппыт икки улахан уйуктаах массыыната Өймөкөөҥҥө кэлэн сүөкэннилэр.

Дьэ, онон Өймөкөөн суола оҥоһуллан, бу күннэргэ атын улуустар биригээдэлэрэ эмиэ кэлэн, Тымныы полюһунан аатырар Өймөкөөҥҥө өрөспүүбүлүкэтээҕи чөлүгэр түһэрии үлэтэ күргүөмнээхтик ыытыллыаҕа.