Сунтаар уһун үйэлээхтэрин туһунан кинигэ сүрэхтэннэ

Сунтаар улууһун Маар Күөлүттэн Модест Петров уонна Тойбохойтон төрүттээх Александра Яковлева иккиэ буолан улахан айар үлэни оҥордулар. «Сунтаар улууһун уһун үйэлээхтэрэ» диэн 365 уһун үйэлээх биир дойдулаахтарбытын киэҥник сырдатар кинигэни таһаардылар.

Бу кинигэни улуус дьаһалтата өйөөн таһааран, өссө сиэрийэ курдук салгыахха диэн бигэ тыл этилиннэ. Кинигэ биһирэмигэр дьон олус элбэх, ытык-мааны ааптардарга барҕа махтал, истиҥ эҕэрдэ ананна.

Киһи сөҕөр, сэрии ыар кэмнэрин оҕолоро олох саамай уустук кэмнэрин көрсүбүт дьоммут уһун үйэлэнэн холобур буолаллар. Бу көрсүһүүгэ уһун үйэлэнии аһыыр аспытыттан улахан тутулуктааҕын сэргии иһиттим. Кырдьык да, уһун үйэлэнэргэ төрүт аспыт сүрүн оҥкул буоллаҕа. Үйэлээх үлэ биһирэммитинэн эҕэрдэ!

Тускулаана ГОРОХОВА-КОБЕЛЬЯНОВА.