Сунтаар улууһугар 500 туонналаах бурдугу харайар ыскылаат тутулунна

Сунтаар улууһун Тойбохой с. фермердэрэ Алексей Сидоров уонна Александр Егоров Тыа хаһаайыстыбатын министиэристибэтин өйөбүлүнэн 500 туонна бурдугу куурдар уонна харайар ыскылааты туттулар.

Манна Тойбохой уонна Бүлүүчээн киэҥ бааһыналарыгар үүммүт бурдугу харайыахтара. Ол туһунан Ил Дархан, бырабыыталыстыба пресс-сулууспата иһитиннэрэр.

Тыа хаһаайыстыбатын министиэристибэтэ «Тыа хаһаайыстыбатын сайыннарыы уонна тыа хаһаайыстыбатын бородууксуйатын, сырьетун, уонна ас-үөл ырыынагын бэрээдэктээһин» судаарыстыбаннай бырагыраама чэрчитинэн, бурдук ыскылаатын тутууга СӨ бүддьүөтүттэн 16,8 мөл солк. көмөнү оҥорбут. Фермердэр тус бэйэлэрин ороскуоттара 6,1 мөлүйүөн солкуобайга тэҥнэһэр.

Тойбохой сэлиэнньэтигэр ыскылаат үөрүүлээхтик аһыллыытыгар тыа хаһаайыстыбатын миниистирин бастакы солбуйааччы Анна Стручкова сырытта. Кини Тойбохойдооҕу хаһаайыстыба улуус сүөһүтүн аһылыгын элбэтиигэ көхтөөхтүк үлэлиирин бэлиэтээтэ.

«Кэлиҥҥи сылларга Сунтаар улууһугар бааһынаны чөлүгэр түһэриигэ улахан үлэ ыытылынна. Улууска олор иэннэрэ сыллата улаатан иһэр», — диэтэ Анна Стручкова.