Сунтаар улууһугар ойуур баһаарын тохтоттулар

Бүгүн Сунтаар улууһугар Туойдаах нэһилиэгин аттыгар ойуур баһаара умуруорулунна. Уот турбутун туһунан бэҕэһээ, ыам ыйын 23 күнүгэр, киэһээ 16.10 чааска биллибитэ.

Тутатына уот турбут сиригэр 7 киһи парашютунан түспүттэрэ, сиринэн “Якутлесресурс” 9 үлэһитэ баһаары умуллара тиийбиттэрэ. Бу туһунан СӨ экологияҕа, айылҕаны туһаныыга миниистирин солбуйааччы Андрей Коноплев иһитиннэрдэ. Ити киэһээ 3,5 гектар ойуур баһаарын тарҕаныыта хааччахтаммыт.

Бүгүҥҥү күн туругунан умайа сытар айылҕа баһаара өрөспүүбүлүкэ үрдүнэн суох. Саха сиригэр Баһаар кутталлаах кэмэ саҕаланыаҕыттан ыла 33 гектар иэннээх аҕыс ойуур баһаара, 34 ландшафтнай баһаар бэлиэтэннэ. Баһаар үксэ уоту сэрэҕэ суох туттууттан уонна өртөөһүнтэн күөдьүйбүтэ биллэр.