Сунтаар улууһугар полиция үлэһиттэрэ бэлисипиэт уоруутун арыйдылар

Арассыыйа ИДьМ Сунтаар улууһунааҕы полиция холуобунай ирдэбилин үлэһиттэрэ 14000 солкуобай сыаналаах бэлисипиэт уоруутун арыйдылар. Суһал ирдээһин үлэтин түмүгүнэн полиция үлэһиттэрэ урут сууттана сылдьыбыт, 2001 сыллаах төрүөх олохтоох киһи уорууга сыһыаннааҕын быһаардылар.

Полиция үлэһиттэрэ быһаарбыттарынан, уорбаланааччы эбиэт кэннэ чааһынай дьиэ хаһаайыттара суохтарынан туһанан, тиэргэнтэн бэлисипиэт уорбут. Уоруллубут икки көлүөһэлээх тырааныспары хаһаайыттара билбэтиннэр диэн, уорбаланааччы багажнигын уонна иннин ылан кэбиспит. Ол эрээри, онто көмөлөспөтөх.

Уоруллубут тырааныспар былдьанна. Буруйдаахха Арассыыйа Федерациятын Холуобунай кодексын 158 ыстатыйатын 2 чааһынан («Уоруу») холуобунай дьыала көбүтүлүннэ, тустаах киһи бу ыстатыйанан 5 сылга диэри көҥүлэ быһыллыан сөп.