Сунтаар улууһун дэлэгээссийэтэ  байыаннай дьайыы сиригэр үлэлиир

Сунтаар улууһун баһылыга Анатолий Григорьев салайааччылаах улуус дэлэгээссийэтэ  байыаннай дьайыы буола турар сиригэр үлэтин салҕыыр.

Гуманитарнай көмөнү үксэ Сунтаартан уонна Дьокуускайтан атыылаһан илтилэр. Оттон сыаналаах тэриллэри миэстэтигэр байыаннай сэби-сэбиргэли атыылыыр лааппылартан бэйэлэрэ тутан-хабан, хаачыстыбатын көрөн ылаллар. Тепловизор, генератор, дрон, ону тэҥэ үс устуука тимир көлөнү ылан тиэртилэр.

Байыастар үөрүүлэрэ үрдүк. Олохторун өрүһүйэр наадалаах тэриллэри, дойдуларыттан кэһиилэри тутан, биир дойдулаахтарын көрсөн сүргэлэрэ көтөҕүлүннэ.

Сунтаардар бэйэ-бэйэлэрин кытта сибээһи ыкса туталлар. Ким ханна сылдьарын, тугу гынарын, ханна тиийбитин чопчу билэн олороллор. Түргэн кэминэн биир сиргэ муста охсон үчүгэй көрсүһүү буолла. Оттон сорох көрсүбэтэх байыастар малларын тирэх пууннарга хаалларыахтара. «Онон бука бары дойду кэһиитин тутуохтара»- диир Анатолий Григорьев.

Сунтаар улууһун дьаһалтатын пресс-сулууспата