Сунтаар уола Уһук Илин уот ситимин бастыҥ маастарынан буолла

Уһук Илин федеральнай уокурук уот ситимин бастыҥ маастарынан Сунтаар уола Иван Павлов ааттанна.

Бу күннэргэ уот ситимин үлэһиттэригэр Уһук Илин федеральнай уокурук таһымыгар II күрэх буолан ааста. Манна Саха сирин хамаандатыгар «Якутскэнерго» ПАУо Сунтаардааҕы филиалын старшай маастара Иван Павлов кыттыыны ылла. Хамаандаҕа түөрт буолан үлэһиттэр маастарыстыбаларын көрдөрөн, бастакы миэстэни ситистилэр. Бу туһунан Сунтаар улууһун дьаһалтатын ТГ-ханаала иһитиннэрэр.

«110 КВ кыамталаах уот лииньийэтин суһаллык өрөмүөннүүргэ бастыҥ ситиһиилэммит уолбут, бу эйгэҕэ үлэлээбитэ 5 сыл буолла. Кини 2013 сыллаахха Дьокуускайдааҕы профессиональнай лиссиэйи үөрэнэн бүтэрэн, салгыы анал идэни баһылаабыта, — диэн иһитиннэриигэ этиллэр.

Санатар буоллахха, ааспыт сыл түмүгүнэн Саха сирэ уот ситимин күүһүрдүүгэ тутуу кээмэйинэн Уһук Илин федеральнай уокурукка бастакы, оттон Арассыыйаҕа 14 миэстэни ылбыта.