Сунтаар — ытык алаһам!

Сунтаар улууһа төрүттэммитэ 224 сылын бэлиэтиир Өрөгөйдөөх күн үөрүүлээх тэрээһинэ С.А. Зверев аатынан норуот айымньытын киинигэр буолла.

Улуус баһылыга Анатолий Григорьев тыл этиититтэн саҕалаан Сунтаар туһунан ыллам ырыалар ылланнылар, үрдүк наҕараадалар туттарылыннылар.

Өрөспүүбүлүкэ баһылыгын уонна бырабыыталыстыба  дьаһалтатын салайааччыта Георгий Михайлов байыаннай дьайыы  кыттыылааҕа Евгений Даниловка 2-с истиэпэннээх «Хорсун быһыы иһин» мэтээли туттарда. Ону тэҥэ «Саллаат аҕата» уонна «Аҕа дойдуну көмүскээччи ийэтэ» анал ааттары Иннокентий Ивановка, Саргылаана Егороваҕа, Саргылаана Ивановаҕа Ил Дархан аатыттан долгутуулаах түгэҥҥэ туттарда. Тэрээһин кыттыылаахтара сүһүөхтэригэр туран эрэ үрдүк наҕарааданы чиэстээтилэр.

Улуус баһылыга Анатолий Григорьев уонна депутаттар Сэбиэттэрин бэрэссэдээтэлэ Ульяна Попова улуус сайдыытыгар кылааттарын киллэрбит үтүө үлэһит дьоҥҥо «Сунтаар улууһун бочуоттаах олохтооҕо» анал ааты, ытык бэлиэни туттардылар. Ону тэҥэ, тутууга, суолу оҥорууга, үүнэр көлүөнэни иитиигэ, бастыҥ уопсастыбаннай үлэлээх дьоҥҥо анал наҕараадалар туттарылыннылар.

Сунтаар дьоно мэлдьи бастакынан көмөҕө кэлэр үтүө үгэстээх. Ол курдук, бу сайын Өймөкөөҥҥө буолбут халааҥҥа  биригээдэ хомунан көмөҕө туруммут эр дьоҥҥо улуус баһылыга Анатолий Григорьев махтал суруктар туттарда. Кинилэр биир ый устата халаан уутуттан эмсэҕэлээбит эбийиэктэри чөлүгэр түһэриигэ үлэлээбиттэрэ. Олохтоохтор сунтаардар барыны бары сатыылларыттан, үлэни кыайа-хото туталларыттан астынан, биһирээн элбэх махтанар тыллары эппиттэрэ.

Сунтаар улууһа кэлиҥҥи сылларга спорт түһүлгэтигэр дорҕоонноохтук ааттанар буолла. Ол курдук, Лев Павлов, Мария Тараярова, Наталья Леонтьева курдук чаҕылхай спортсменнарбытынан киэн туттабыт.

Сунтаар күнүн бэлиэтиир Өрөгөйдөөх түгэҥҥэ улуус баһылыга Анатолий Григорьев, быйыл Таатта улууһугар 22-с төгүлүн ыытыллыбыт Манчаары оонньууларын кыайыылаахтарын эҕэрдэлээтэ, наҕараадалары туттарда.

Спорт — ил-эйэ, күөн күрэс түһүлгэтэ өрөгөйдүү турдун!

@suntaar_ulus