Сунтаардар байыастарга бэйэ дойду аһын — кэнсиэрбэ астаан ыытыахтара

Бу күннэргэ «Улуустааҕы тыа хаһаайыстыбатын управлениетын үлэһиттэрэ байыаннай дьайыы зонатыгар сылдьар байыастарга анаан 100-түү устуука ынах уонна сылгы этиттэн кэнсиэрбэ оҥорон бэлэмниэхтэрэ.

Ол курдук, Тойбохойдооҕу “Хочо” МУП тэрилтэттэн 50 киилэ ынах, 50 киилэ сылгы этин атыылаһан ылан, кыра гына кырбаан Күндэйэҕэ Сергей Еремеев дириэктэрдээх «Тускул» кэпэрэтиипкэ илдьэн туттардылар. Үлэһиттэр байыаннай дьайыыга кыттыыны ылар биир дойдулаахтарыгар көмөлөһөргө бары күүһү уураллар, хайа да түгэҥҥэ илиилэрин утары ууналлар. Бу сырыыга дойдуларын кэнсиэрбэтин номнуо үһүс төгүлүн астаан ыыталлар», — диэн тыа хаһаайыстыбатын салалтатын салайааччыта Владимир Анисимов иһитиннэрдэ.

Оттон улуус дьаһалтатын дэлэгээссийэтэ байыастарга бэйэ дойду аһын, малын-салын тиксэрэр сыаллаах айаннаата. Уопсайа 450 киилэ ыйааһыннаах гуманитарнай көмө бэлэмнэннэ. Дэлэгээссийэни Сунтаар улууһун баһылыга Анатолий Григорьев салайар. Манна анаан «Харысхал» үтүө көмөһүттэр хамсааһыннара харыстыыр сиэккэлэри баайан уонна хас биирдии уолга тус көмө баһыылкатын бэлэмнээн ыыттылар. Бу туһунан Сунтаар улууһун дьаһалтатын пресс-сулууспата иһитиннэрэр.