Сунтаардар — Тааттаҕа Манчаарыга

Манчаары оонньууларын  биир саамай тыҥааһыннаах мас тардыһыытын күрэһигэр биэс уолбут Түбэйтэн Марат Илларионов, Кириэстээхтэн Алквиад Григорьев, Кутанаттан Николай Иванов, Маар Күөлтэн Нюргун Петров, Сунтаартан Зафарджон Решетников боруонса мэтээллэри ситистилэр. Зафарджон бастакы Манчаарым, олус долгуйдум диэн санаатын үллэстэр.

Федор Федоров финалга Василий Сивцевтан кыһыылаахтык кыайтаран үрүҥ көмүс мэтээли ситистэ.

Наталья Леонтьева иккис кыһыл көмүс мэтээли дойдутугар бэлэхтээтэ.

Күрэс кэмигэр Александр Харитонов — байаныыс Сааска кыыһын Дашаны уонна Тойбохойтон Тотоновтары көрүстүм.

Бэҕэһээҥҥиттэн хапсаҕай саҕаланна! Көрдүгэн саҥата үөрдэ-көтүтэ түһүлгэҕэ ыҥырда! Уолаттарбыт кыах баарынан киирсэ сылдьаллар.

Ыстаныыга муҥутуур көрдөрүүлээх Тааттаттан Андрей Васильев ыстаныытын көрөн астынным. Күрэс кэмигэр биир дойдулаахпытын Добун Иванову көрүстүм. НВК-ҕа практикалана сылдьар эбит.

Хабылык, хаамыска эмиэ саҕаланна. Биһиги күрэсчиттэрбит бастакы күннэрин бэркэ түмүктээтилэр. Манан диэн эттэххэ, Сунтаартан төрүттээх остуол оонньуутун ааттаах спортсменнара элбэхтэр.

Наҕараадалааһын тэрилиннэ. Бүгүн хапсаҕай, остуол оонньуутун түмүктэрэ биллиэҕэ. Ону кытта дэгит оонньуу саҕаланаҕа, ат сүүрдүүтэ куоракка көстө, манна бүгүн бостуук аттар сүүрдүлэр.

Тааттаттан Тускулаана ГОРОХОВА-КОБЕЛЬЯНОВА